លោកជំទាវ ចឹក ហេង សមាជិកាក្រុមសមាជិកព្រឹទ្ធសភាប្រចាំភូមិភាគទី៨ អមដំណើរដោយ លោក មួង ប៉ាង អភិបាលរង នៃគណៈអភិបាលខេត្តរតនគិរី បានអញ្ជើញចុះជួបសំណេះសំណាលជាមួយក្រុមប្រឹក្សាឃុំលំជ័រ ឃុំប៉ាតតេ ឃុំប៉ក់ញៃ ឃុំសេសាន ស្មៀន និងនាយប៉ុស្តិ៍នគរបាល នៃស្រុកអូរយ៉ាដាវ ខេត្តរតនគិរី។
ពិធីសំណេះសំណាលទាំងបួនឃុំនេះ បានប្រព្រឹត្តទៅនៅវេលាពេលព្រឹកនៅសាលាឃុំលំជ័រ និងពេលរសៀលនៅសាលាឃុំប៉ក់ញ៉ៃ នៃស្រុកអូរយ៉ាដាវ នៅថ្ងៃចន្ទ ១៣រោច ខែផល្គុន ឆ្នាំម្សាញ់ សប្តស័ក ព.ស.២៥៦៩ ត្រូវថ្ងៃទី១៦ ខែមីនា ឆ្នាំ២០២៦។
បន្ទាប់ពីបានស្តាប់របាយការណ៍របស់លោកមេឃុំ និងក្រុមប្រឹក្សាឃុំទាំង៤រួចមក លោកអភិបាលរងខេត្តបានមានយោបល់បំភ្លឺចំណុច១ចំនួន។ លោកជំទាវ បានមានប្រសាសន៍ដល់អាជ្ញាធរមូលដ្ឋាន ត្រូវបន្តត្រួតពិនិត្យតាមដានផែនការ និងសកម្មភាពរាល់ចំណុចអ្វីដែលធ្វើបាន និងអ្វីដែលធ្វើមិនទាន់បានខិតខំធ្វើបន្ដ។
ឆ្លៀតក្នុងឱកាសនោះ លោកជំទាវបានសំណូមពរក្រុមប្រឹក្សាឃុំស្មៀន និងនាយប៉ុស្ដិ៍ជំរុញឱ្យប្រជាពលរដ្ឋ ដែលបានផ្លាស់ប្ដូរទីលំនៅត្រូវត្រៀមឯកសារ ដើម្បីចុះឈ្មោះបោះឆ្នោតនាពេលខាងមុខ និងបានមានមតិផ្ដាំផ្ញើដល់សមាជិកក្រុមប្រឹក្សាឃុំ ស្មៀន និងនាយប៉ុស្ដិ៍នគរបាល ត្រូវបន្តរក្សាសាមគ្គីភាព ដើម្បីផ្ដល់សេវាសាធារណៈ និងការអនុវត្តន៍នៅមូលដ្ឋានឱ្យកាន់តែប្រសើរ ជាពិសេសត្រូវខិតខំដោះស្រាយទំនាស់ក្រៅប្រពន្ធតុលាការជូនប្រជាពលរដ្ឋ។
នាឱកាសនោះដែរ លោកជំទាវបានជូនបំពង់ទឹក និងថវិកាមួយចំនួនដល់ក្រុមប្រឹក្សាឃុំ ស្មៀន និងនាយប៉ុស្ដិ៍នគរបាល។

ប្រភព៖ ការិយាល័យអមក្រុមសមាជិកព្រឹទ្ធសភាប្រចាំភូមិភាគទី៨