នាព្រឹកថ្ងៃសុក្រ ៦រោច ខែបុស្ស ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី៩ ខែមករា ឆ្នាំ២០២៦ ក្រុមសមាជិកព្រឹទ្ធសភាប្រចាំភូមិភាគទី២ (ខេត្តកំពង់ចាម និងខេត្តត្បូងឃ្មុំ) ដឹកនាំដោយ ឯកឧត្តម អ៊ុច បូររិទ្ធ អនុប្រធានទី១ព្រឹទ្ធសភា និងជាប្រធានក្រុមសមាជិកព្រឹទ្ធសភាប្រចាំភូមិភាគទី២ បានអញ្ជើញគោរពវិញ្ញាណក្ខន្ធសពឧបាសិកា ធិន ធឹង ត្រូវម្តាយបង្កើតរបស់ឯកឧត្តម ឡោ ចាន់លី សមាជិកគណៈកម្មាធិការអចិន្ត្រៃយ៍គណបក្សខេត្តកំពង់ចាម ដែលបានទទួលមរណភាព កាលពីថ្ងៃពុធ ទី៧ ខែមករា ឆ្នាំ២០២៦ ក្នុងជន្មាយុ ៧៦ឆ្នាំ ដោយជរាពាធ។
ក្នុងពេលវេលាពោពេញដោយសមានទុក្ខដ៏ក្រៀមក្រំនេះ ឯកឧត្តមអនុប្រធានទី១ និងក្រុមសមាជិកព្រឹទ្ធសភាប្រចាំភូមិភាគទី២ បានចូលរួមរំលែកទុក្ខ និងសំដែងនូវការស្តាយស្រណោះ អាឡោះអាល័យស្ទើរកទីបំផុតគ្មាន ព្រោះថា មរណភាពឧបាសិកា ធិន ធឹង គឺជាការបាត់បង់នូវឧត្តមភរិយា ម្តាយ ម្តាយក្មេក និងជីដូន ចំពោះក្រុមគ្រួសារជាទីស្រលាញ់ដ៏ជ្រាលជ្រៅ និងប្រកបដោយព្រហ្មវិហារធម៌របស់កូនៗ ចៅ ចៅទូត ព្រមទាំងក្រុមគ្រួសារ។ សូមឧទ្ទិសបួងសួងដល់ដួងវិញ្ញាណក្ខន្ធឧបាសិកា ធិន ធឹង បានបដិសន្ធិក្នុងសុគតិភពកុំបីឃ្លៀងឃ្លាតឡើយ។ក្នុងឱកាសនោះ ឯកឧត្តមប្រធានក្រុមភូមិភាគទី២ បានចូលរួមថវិកាជាមួយគ្រួសារសពចំនួន១.០០០.០០០រៀល(មួយលានរៀល)។
សពរបស់ឧបាសិកា ធិន ធឹង ត្រូវបានតម្កល់ធ្វើបុណ្យទក្ខិណានុប្បទាន តាមប្រពៃណីព្រះពុទ្ធសាសនា នៅគេហហដ្ឋាននៃសព ស្ថិតនៅភូមិតាំងងក្រាំង ឃុំជាលា ស្រុកបាធាយ ខេត្តកំពង់ចាម។
ប្រភព៖ នាយកដ្ឋានព័ត៌មាន
