រសៀលថ្ងៃទី០៩ ខែកុម្ភ: ឆ្នាំ២០២៣ នៅសាលាស្រុកជលគិរី ខេត្តកំពង់ឆ្នាំង ឯកឧត្តម អ៊ឹង លាងហ៊ួ សមាជិកគណៈកម្មការទី៧ ព្រឹទ្ធសភា និងជាសមាជិកក្រុមសមាជិកព្រឹទ្ធសភា ប្រចាំភូមិភាគទី៧ បាននាំយកឧបករណ៍តេស្តរហ័សរកវិជ្ជមានមេរោគកូវីដ-១៩ ដែលជាអំណោយដ៏ថ្លារបស់សម្ដេចវិបុលសេនាភក្ដីប្រធានព្រឹទ្ធសភា ជូនលោកមេឃុំ តំណាងឲ្យសមាជិកឃុំទាំង០៥ ក្នុងស្រុក និងកម្លាំងប្រដាប់អាវុធទាំង០៣របស់ស្រុក ដោយមានការ ចូលរួមពីលោកប្រធានក្រុមប្រឹក្សាស្រុក លោកអភិបាលស្រុក លោកនាយករដ្ឋបាលសាលាស្រុកសរុបចំនួន ១២នាក់ ដោយជូនឧបករណ៍តេស្តចំនួន៤០ប្រអប់។ ក្នុងឱកាសនោះ ឯកឧត្តម បានពាំនាំនូវការសាកសួរសុខទុក្ខ និងជូនពរ ពីថ្នាក់ដឹកនាំព្រឹទ្ធសភា និងបានថ្លែងកោតសរសើរនូវស្នាដៃជាផ្លែផ្កា នៃការខិតខំធ្វើឲ្យមូលដ្ឋានមានភាពសុខសាន្ត សណ្ដាប់ធ្នាប់ល្អ ជីវភាពប្រជាជនកាន់តែប្រសើរ និងសំណូមពរសុំឲ្យយកចិត្តទុកដាក់បន្ថែម ៖
-ពង្រឹងការអនុវត្តគោលនយោបាយភូមិ ឃុំមានសុវត្ថិភាព
-ការផ្ដល់សេវាសាធារណ:ជូនប្រជាជនឲ្យបានឆាប់ និងទាន់ពេល
-ជម្រុញប្រជាពលរដ្ឋឱ្យទៅចាក់វ៉ាក់សាំងដូសមូលដ្ឋាន និងដូសជម្រុញ
-អនុវត្តកញ្ចប់ថវិកាអភិវឌ្ឍមូលដ្ឋានឲ្យមានប្រសិទ្ធភាព
-ការធ្វើអត្តសញ្ញាណបណ្ណប្រជាពលរដ្ឋ
-ខិតខំដោះស្រាយបញ្ហាប្រឈមនានា ឲ្យអស់លទ្ធភាព
-និងបន្តប្រើប្រាស់កម្លាំងសរុប មធ្យោបាយសរុប ធនធានសរុប ដោយធ្វើសកម្មភាពឲ្យបានព្រមៗគ្នា ដើម្បីទទួលជ័យជម្នះនាពេលខាងមុខ។ ចុងបញ្ចប់ឯកឧត្តម បានឧបត្ថម្ភថវិកាមួយចំនួនដល់អ្នកចូលរួមផងដែរ។