ក្នុងក្របខ័ណ្ឌនៃដំណើរទស្សនកិច្ចសិក្សានៅសាធារណរដ្ឋប្រជាមានិតចិន នាថ្ងៃទី២៦ ខែមិថុនា ឆ្នាំ២០២៦ គណៈប្រតិភូអគ្គលេខាធិការដ្ឋានព្រឹទ្ធសភាកម្ពុជា បានអញ្ជើញចូលរួមក្នុង «វេទិកាកម្រិតខ្ពស់ស្តីពីអភិបាលកិច្ចជាតិក្នុងបណ្តាប្រទេសកំពុងអភិវឌ្ឍន៍ ឆ្នាំ២០២៦» នៅរដ្ឋធានីប៉េកាំង ។
វេទិកាកម្រិតខ្ពស់នេះ ត្រូវបានរៀបចំឡើងក្រោមមូលបទ “បេសកកម្មប្រវត្តិសាស្ត្រ និងតម្លៃសកម្មភាពនៃការដឹកនាំជាតិ” ដោយមានការអញ្ជើញចូលរួមពីថ្នាក់ដឹកនាំរដ្ឋាភិបាល អ្នកស្រាវជ្រាវកម្រិតខ្ពស់ (Think Tank) និងអ្នកជំនាញជាង ១៥០រូប មកពី ២០ប្រទេស និងអង្គការអន្តរជាតិ រួមមាន ចិន កាហ្សាក់ស្ថាន អេស្ប៉ាញ ម៉ាឡេស៊ី នីហ្សេរីយ៉ា អាល់ហ្សេរី អេក្វាទ័រ និងតំណាងសហភាពអឺរ៉ុប។
នៅក្នុងបទអន្តរាគមន៍គន្លឹះ នៃអង្គវេទិកានេះ លោកជំទាវ សុខ លក្ខិណា នាយិការងខុទ្ទកាល័យអនុប្រធានទី២ព្រឹទ្ធសភា បានចែករំលែកនូវទស្សនទានសំខាន់ៗ ដែលជាខ្លឹមសារស្នូលនៃសុន្ទរកថា រួមមាន៖
យុទ្ធសាស្ត្រកិច្ចសហប្រតិបត្តិការ និងសាមគ្គីភាពចំនួន ៣ ចំណុច៖ (ទីមួយ) សាមគ្គីភាពត្រូវផ្អែកលើការយល់ដឹងពីលក្ខខណ្ឌជាក់ស្តែងរបស់ប្រទេសនីមួយៗ; (ទីពីរ) អភិបាលកិច្ចដែលជោគជ័យត្រូវតែចាក់ឫសក្នុងវប្បធម៌ និងប្រវត្តិសាស្ត្រជាតិ; (ទីបី) កិច្ចសហប្រតិបត្តិការប្រកបដោយតម្លៃពិតប្រាកដ គឺការចែករំលែកបទពិសោធន៍នៃការអនុវត្តការងារជាក់ស្តែងនៅក្នុងស្ថាប័ន។
វិធីសាស្ត្រកំណែទម្រង់ចំនួន ៤ ចំណុច៖ រួមមាន ការចុះស្រាវជ្រាវដល់មូលដ្ឋានផ្ទាល់, ការប្រើប្រាស់យន្តការច្បាប់និងលិខិតបទដ្ឋានគតិយុត្តដែលមានស្រាប់ជាធរមាន, ការបង្កើតប្រព័ន្ធការពារ និងលើកទឹកចិត្តដល់មន្ត្រីដែលបោះជំហានធ្វើនវានុវត្តន៍, និងការបែងចែកឱ្យបានច្បាស់លាស់រវាង «មធ្យោបាយ» និង «បេសកកម្ម» របស់ស្ថាប័ន។
ជាទីបញ្ចប់ លោកជំទាវបានបង្ហាញពីសមិទ្ធផលនៃការធ្វើបរិវត្តកម្មឌីជីថលរបស់កម្ពុជា តាមរយៈប្រព័ន្ធ Bakong, CamDX និង CamDigiKey ព្រមទាំងបានអំពាវនាវដល់បណ្តាប្រទេសនៃពិភពលោកខាងត្បូង (Global South) ក្នុងការបង្កើនសាមគ្គីភាព និងការគោរពគ្នាទៅវិញទៅមក ដើម្បីសន្តិភាព និងវិបុលភាពរួម។
ប្រភព៖ ក្រុមការងារព័ត៌មាន និងទំនាក់ទំនងនៃសិក្ខាកាមចូលរួមសិក្ខាសាលានៅរដ្ឋធានីប៉េកាំង ប្រទេសចិន
