រសៀលថ្ងៃទី១៤ ខែកុម្ភៈ ឆ្នាំ២០២៣ ឯកឧត្តម ខៀវ មុត អនុប្រធានគណៈកម្មការទី១ព្រឹទ្ធសភា ប្រធានក្រុមសមាជិកព្រឹទ្ធសភាប្រចាំភូមិភាគទី៥ បានអញ្ជើញចុះជួបសំណេះសំណាលសួរសុខទុក្ខ ថ្នាក់ដឹក មន្ត្រីរដ្ឋបាលស្រុក មេឃុំទាំង១៥ និងមណ្ឌលសុខភាពទាំង១៣ ចំណុះស្រុកប្រតិបត្តិបាទី ដែលមានសមាសភាពចូលរួមសរុបចំនួន ៣៧នាក់ នៅក្នុងសាលប្រជុំសាលាស្រុកបាទី ខេត្តតាកែវ ។
ក្នុងពិធីសំណេះសំណាលឯកឧត្តម ខៀវ មុត បានពាំនាំប្រសាសន៍ផ្ដាំផ្ញើសួរសុខទុក្ខរបស់សម្ដេចវិបុលសេនាភក្ដីប្រធានព្រឹទ្ធសភា និងបានជម្រាបជូនអំពីតួនាទី ភារកិច្ច និង មុខងាររបស់ព្រឹទ្ធសភា ព្រមទាំងបានសំណូមពរដល់មន្ត្រីសុខាភិបាល និង អាជ្ញាធរស្រុក ឃុំ បន្តយកចិត្តទុកដាក់ថែរក្សាសន្តិភាព ពង្រឹងកិច្ចការពារសន្តិសុខ សុវត្តិភាព និង សណ្ដាប់ធ្នាប់សាធារណៈឲ្យបានល្អប្រសើរ ត្រៀមលក្ខណៈឲ្យបានគ្រប់ជ្រុងជ្រោយឆ្ពោះទៅកាន់ការបោះឆ្នោតជ្រើសតាំងតំណាងរាស្ត្រអាណត្តិទី៧ និងបន្តចុះអប់រំសុខភាពជូនប្រជាពលរដ្ឋដើម្បីបង្ការទប់ស្កាត់ការរីករាលដាលនូវជំងឺគ្រប់ប្រភេទ ពិសេសការប្រយុទ្ធប្រឆាំងនឹងជំងឺកូវីដ-១៩ ដោយត្រូវបន្តអនុវត្តនូវវិធានការ៣ការពារ និង ៣កុំ ឲ្យបានខ្ជាប់ខ្ជួនជាប់ជាប្រចាំ ។
មុននឹងបញ្ចប់កម្មវិធីសំណេះសំណាលឯកឧត្តមបានប្រគល់ជូននូវឧបករណ៍តេស្តរហ័ស( Rapid Test )កូវីដ-១៩ ចំនួន ១៣៥ប្រអប់ ស្មើនឹងឧបករណ៍តេស្តចំនួន ៣៣៧៥ឧបករណ៍តេស្តដល់រដ្ឋបាលស្រុក ស្រុកប្រតិបត្តិបាទី និងមណ្ឌលសុខភាពទាំង១៣ ដោយក្នុងមួយមណ្ឌលសុខភាពទទួលបានចំនួន៩ប្រអប់ ស្មើនឹង២២៥តេស្ត ព្រមទាំងបានឧបត្ថម្ភថវិកាមួយចំនួនជូនដល់មណ្ឌលសុខភាពទាំង១៣ មណ្ឌលផងដែរ។