នាព្រឹកថ្ងៃទី១ ខែវិច្ឆិកា ឆ្នាំ២០២៣ ឯកឧត្ដម អន ស៊ុ លេខាធិការគណៈកម្មការទី៤ ឯកឧត្ដម ឈើយ ចាន់ណា លេខាធិការគណៈកម្មការទី៧ ព្រឹទ្ធសភា និងជាសមាជិកក្រុមសមាជិកព្រឹទ្ធសភា ប្រចាំភូមិភាគទី៤ បានអញ្ជើញចូលរួមអបអរសាទរពិធីសម្ពោធដាក់ឲ្យប្រើប្រាស់ជាផ្លូវការអគារសប្បុរស នៃក្តីស្រលាញ់ មន្ទីរបង្អែកព្រះនេត្រព្រះ និងអគារជំងឺកុមារ នៅមន្ទីរពេទ្យខេត្តមិត្តភាពកម្ពុជា-ជប៉ុន មង្គលបុរី ដែលបានជួលជុល និងកែលម្អ ក្រោមមូលនិធិសមាគមនិកាយសាសនាចក្រ នៃព្រះយេស៊ូគ្រីស្ត នៃពួកបរិសុទ្ធថ្ងៃចុងក្រោយ (The association of the church of Jesus Christ of Latter-day Saints) ក្រោមអធិបតីភាពឯកឧត្ដម ង៉ូវ កាង រដ្ឋលេខាធិការ ក្រសួងសុខាភិបាល តំណាងដ៏ខ្ពង់ខ្ពស់ ឯកឧត្ដមសាស្រ្តាចារ្យ ឈាង រ៉ា រដ្ឋមន្ត្រីក្រសួងសុខាភិបាល ស្ថិតនៅឃុំជប់វារី ស្រុកព្រះនេត្រព្រះ ខេត្តបន្ទាយមានជ័យ។ នៅក្នុងពិធីនេះ ឯកឧត្តមរដ្ឋលេខាធិការ បានថ្លែងអំណរគុណយ៉ាងជ្រាលជ្រៅចំពោះ សមាគមនិកាយសាសនាចក្រ នៃព្រះយេស៊ូគ្រីស្ត នៃពួកបរិសុទ្ធថ្ងៃចុងក្រោយ ដែលបានបរិចាកថវិកាប្រមាណជា ១,៤១២,៦២៧ដុល្លារអាមេរិក ក្នុងការជួយសាងសង់អគារសម្រាកព្យាបាលជំងឺ នៅក្នុងមន្ទីរពេទ្យបង្អែកព្រះនេតព្រះនេះ ជួយជួសជុលកែលម្អអគារផ្នែកជំងឹកុមារ នៅមន្ទីរពេទ្យខេត្តមិត្តភាពកម្ពុជា-ជប៉ុន មង្គលបុរី បំពាក់សម្ភារៈបរិក្ខាវេជ្ជសាស្ត្រទំនើបៗ ជួយបន្តបណ្តុះបណ្តាលធនធានមនុស្ស ដែលជាសកម្មភាពមនុស្សធម៌ដ៏ថ្លៃថ្លាបំផុត និងជាផ្នែកមួយក្នុងការចូលរួមពង្រឹងគុណភាពសេវាសុខាភិបាល នៅតាមមូលដ្ឋានសុខាភិបាលសាធារណៈ ជាមួយរាជរដ្ឋាភិបាល នីតិកាលទី៧ នៃរដ្ឋសភា។