នាព្រឹកថ្ងៃទី២០ ខែវិច្ឆិកា ឆ្នាំ២០២៣ គណៈប្រតិភូគណៈកម្មការកិច្ចការបរទេស សហប្រតិបត្តិអន្តរជាតិ ឃោសនាការ និងព័ត៌មាននៃព្រឹទ្ធសភា (គណៈកម្មការទី៥) ដឹកនាំដោយលោកជំទាវកិតិ្តនីតិកោសលបណ្ឌិត ទី បូរ៉ាស៊ី ប្រធានគណៈកម្មការ បានអញ្ជើញជួបពិភាក្សាការងារជាមួយ អាជា្ញធរអាកាសយានដ្ឋានអន្តរជាតិសៀមរាបអង្គរ ដឹកនាំដោយឯកឧត្តម ឧត្តមសេនីយ៍ត្រី ទឹម សុភា នាយប៉ុស្តិ៍ច្រកទ្វារអាកាសយានដ្ឋានអន្តរជាតិសៀមរាបអង្គរ នៅអាកាសយានដ្ឋានអន្តរជាតិសៀមរាបអង្គរ ខេត្តសៀមរាប។
គោលបំណងនៃជំនួបពិភាក្សានាពេលនោះ គឺដើម្បីស្វែងយល់អំពីការអនុវត្តច្បាប់អន្តោប្រវេសន៍ ការគ្រប់គ្រងជនបរទេស និងពិនិត្យស្ថានភាពចេញ-ចូលរបស់ភ្ញៀវជាតិ និងអន្តរជាតិ កិច្ចសហប្រតិបត្តិការ ភាពងាយស្រួល និងបញ្ហាប្រឈមនានានៅច្រកទ្វារអាកាសយានដ្ឋានអន្តរជាតិសៀមរាបអង្គរ។
សូមជម្រាបថា អាកាសយានដ្ឋានអន្តរជាតិសៀមរាបអង្គរត្រូវបានសម្ពោធដាក់ឱ្យប្រើប្រាស់ជាផ្លូវការកាលថ្ងៃទី១៦ ខែវិច្ឆិកា ឆ្នាំ២០២៣ ក្រោមអធិបតីភាពដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា។ អាកាសយានដ្ឋាននេះ ស្ថិតលើផ្ទៃដី៧០០ហិកតា នៅក្នុងឃុំតាយ៉ែក ស្រុកសូទ្រនិគម និងឃុំគោកធ្លកលើ ស្រុកជីក្រែង ព្រលានអន្តរជាតិមួយនេះ មានចម្ងាយជាង៤០គីឡូម៉ែត្រពីរមណីយដ្ឋានអង្គរ និងជាង៥០គីឡូម៉ែត្រពីទីប្រជុំជនក្រុងសៀមរាប។
ប្រភព៖ នាយកដ្ឋានព័ត៌មាន
