ឯកឧត្តមបណ្ឌិត ធន់ វឌ្ឍនា អនុប្រធានទី២ ព្រឹទ្ធសភា បានអញ្ជើញជួបសំណេះសំណាលជាមួយលោកគ្រូ អ្នកគ្រូ សិស្សានុសិស្សនៃសាលាបឋមសិក្សាកោះដាច់ ដោយបាននាំយកទឹកដោះគោ និងសម្ភារៈសិក្សាមួយចំនួន ដែលបានពីការរួមចំណែកឧបត្ថម្ភរបស់ ឯកឧត្តម ម៉ម ប៊ុននាង ប្រធានគណៈកម្មការទី១០ ព្រឹទ្ធសភា ខុទ្ទកាល័យឯកឧត្តមអនុប្រធានទី២ព្រឹទ្ធសភា និងថ្នាក់ដឹកនាំនៅមូលដ្ឋាន ជូនដល់សិស្សានុសិស្សនៃសាលាបឋមសិក្សាកោះដាច់ផងដែរ។
ឆ្លៀតក្នុងឱកាសនោះ ឯកឧត្តមបណ្ឌិត បានកោតសរសើរ ដែលសាលាមានបរិស្ថានស្អាត និងបានលើកទឹកចិត្តលោកគ្រូ អ្នកគ្រូ ដែលដើរតួនាទីសំខាន់ក្នុងការកសាងធនធានមនុស្ស ឱ្យបន្តយកចិត្តទុកដាក់បន្ថែមទៀតក្នុងការបង្ហាត់បង្រៀនសិស្សានុសិស្ស ពិសេស គណិតវិទ្យា ភាសាខ្មែរ និងភាសាអង់គ្លេស។ ឯកឧត្តមបណ្ឌិត ក៏បានចែករំលែកទស្សនៈផ្ទាល់ខ្លួនថា «សុខភាពត្រូវការអាហារូបត្ថម្ភ អប់រំត្រូវការអង់គ្លេស» ។
មុននឹងបញ្ចប់ ឯកឧត្តមបណ្ឌិត ធន់ វឌ្ឍនា បានលើកអំពីការរៀបចំបុណ្យផ្កា ដែលមានការចូលរួមពីព្រឹទ្ធសភា អាជ្ញាធរដែនដី វត្ត សាលា និងមាតាបិតាសិស្ស ដើម្បីប្រមូលថវិកាជួសជុលអគារមួយខ្នង និងរៀបចំឱ្យមានទូរទស្សន៍ភ្ជាប់ជាមួយ Youtube ដែលអាចឱ្យសិស្សរៀនភាសាអង់គ្លេស អនាម័យ វិទ្យាសាស្ត្រ។ល។

ខ្លឹមសារ៖ ខុទ្ទកាល័យឯកឧត្តមអនុប្រធានទី២ព្រឹទ្ធសភា
រូបភាព៖ នាយកដ្ឋានព័ត៌មាន