នាព្រឹកថ្ងៃអង្គារ ៨កើត ខែផល្គុន ឆ្នាំម្សាញ់ សប្តស័ក ពុទ្ធសករាជ២៥៦៩ ត្រូវនឹងថ្ងៃទី២៤ ខែកុម្ភៈ ឆ្នាំ២០២៦ គណៈប្រតិភូគណៈកម្មការអប់រំ យុវជន កីឡា ធម្មការ សាសនា វប្បធម៌ វិចិត្រសិល្បៈ និងទេសចរណ៍ នៃព្រឹទ្ធសភា(គណៈកម្មការទី៧) ដឹកនាំដោយឯកឧត្តម ឈិត សុខុន ប្រធានគណៈកម្មការ បានអញ្ជើញជួបសំណេះសំណាល និងសួរសុខទុក្ខ ព្រមទាំងឈ្វេងយល់ ពីបទពិសោធន៍ល្អៗ ក្នុងការបង្រៀន និងរៀនភាសាបរទេស ជាមួយលោកគ្រូ អ្នកគ្រូ គណៈគ្រប់គ្រងសាលា នៃសាលាបឋមសិក្សាអង្គជុំ ក្នុងស្រុកជុំគិរី ខេត្តកំពត។
ក្នុងនាមគណៈកម្មការទី៧ព្រឹទ្ធសភា ឯកឧត្តម ឈិត សុខុន បានពាំនាំផ្តាំផ្ញើសួរសុខទុក្ខគណៈគ្រប់គ្រងសាលា លោកគ្រូ អ្នកគ្រូ សិស្សានុសិស្ស នៃសាលាបឋមសិក្សាអង្គជុំទាំងអស់ពីសំណាក់ថ្នាកដឹកនាំព្រឹទ្ធសភា និងបានចូលរួមមតិយោបល់ ដើម្បីរួមចំណែកក្នុងការលើកកម្ពស់ការបង្រៀន និងរៀនភាសាបរទេស ឱ្យកាន់តែមានគុណភាព និងប្រសិទ្ធិភាពខ្ពស់ រួមមាន៖
១-សូមលើកទឹកចិត្តឱ្យសាលា បន្តអនុវត្តកម្មវិធីបណ្តុះបណ្តាលភាសាបរទេស និងផ្សព្វផ្សាយពីសារសំខាន់នៃការប្រើប្រាស់ភាសាឱ្យបានកាន់តែទូលំទូលាយ
២-បន្តលើកទឹកចិត្តដល់លោកគ្រូ អ្នកគ្រូ ដែលមានគុណវុឌ្ឍិ ផ្នែកភាសាបរទេស សម្រាប់ចូលរួមការប្រគួតប្រជែងពានរង្វាន់នានា ព្រមទាំងបន្តសហការជាមួយដៃគូ និងអង្គការនានា ដើម្បីរួមគ្នាផ្លាស់ប្តូរបទពិសោធន៍ និងបច្ចេកទេស ក្នុងការបង្រៀនភាសាបរទេស។
៣-លើកទឹកចិត្តឱ្យមានទស្សនកិច្ចសិក្សា ការផ្លាស់ប្តូរបទពិសោធន៍នៅតាមបណ្ដាសាលាដែលមានការបណ្តុះបណ្តាលភាសាបរទេស ពិសេសរវាងវិស័យរដ្ឋ និងឯកជន…។
ប្រភព៖ នាយកដ្ឋានព័ត៌មាន
