ក្នុងកិច្ចប្រជុំជាមួយក្រុមសមាជិកព្រឹទ្ធសភាប្រចាំភូមិភាគទី៥ នារសៀលថ្ងៃពុធ ទី១៨ ខែមីនា ឆ្នាំ២០២៦ នៅវិមានសាមគ្គីភាព ឯកឧត្តមបណ្ឌិត ធន់ វឌ្ឍនា អនុប្រធានទី២ ព្រឹទ្ធសភា បានលើកទឹកចិត្តឱ្យសមាជិកព្រឹទ្ធសភា សហការជាមួយសមាជិករដ្ឋសភា ក្រុមការងាររាជរដ្ឋាភិបាលចុះជួយមូលដ្ឋាន និងអាជ្ញាធរដែនដី ដើម្បីរួមគ្នាដោះស្រាយបញ្ហាប្រឈម និងបម្រើប្រយោជន៍ប្រជាជនតាមភូមិភាគ។ ភូមិភាគទី៥ នៃព្រឹទ្ធសភារួមមានខេត្តតាកែវ កំពត និងកែប និងមានសមាជិកព្រឹទ្ធសភា៧រូប រួមមាន ឯកឧត្តម ខៀវ មុត ឯកឧត្តម ឈួន ឆាម ឯកឧត្តម គិន ណែត ឯកឧត្តម កុក អាន ឯកឧត្តម លីសារី លោកជំទាវ កង សៅរ៍ធន និង ឯកឧត្តម អ៊ុន វណ្ណា។
ឯកឧត្តមបណ្ឌិត ធន់ វឌ្ឍនា បានកោតសរសើរចំពោះកិច្ចសហការគ្នារវាងសមាជិកព្រឹទ្ធសភាប្រចាំភូមិភាគទី៥ ជាមួយ ឯកឧត្តមបណ្ឌិត ប៉ែន ស៊ីម៉ន តំណាងរាស្ត្រមណ្ឌលខេត្តកំពត ឯកឧត្តមបណ្ឌិត សាយ សំអាល់ ប្រធានក្រុមការងារថ្នាក់ជាតិចុះជួយខេត្ត និង ឯកឧត្តម ម៉ៅ ធនិន អភិបាលខេត្តកំពត ក្នុងកិច្ចខិតខំប្រឹងប្រែងជួយមូលដ្ឋានដូចជា ការកែលម្អសោភណភាព និងជីកស្តារស្រះទឹកទន្លេនាម ដែលមានបណ្តោយ២១០ម៉ែត្រ និងទទឹង១៨០ម៉ែត្រ នៅខេត្តកំពត និងការជួយឧបត្ថម្ភដល់ជនភៀសសឹក ពលករត្រលប់ពីប្រទេសថៃ និងយុវជនសមរភូមិមុខ។
ឯកឧត្តមបណ្ឌិត ធន់ វឌ្ឍនា បានលើកទឹកចិត្តសមាជិកព្រឹទ្ធសភាប្រចាំភូមិភាគទី៥ ឱ្យយកចិត្តទុកដាក់ជាប្រចាំលើកិច្ចការទាំងពួង ដែលជាប្រយោជន៍របស់ប្រជាជនក្នុងភូមិភាគរបស់ខ្លួន និងសម្របសម្រួលជួយដោះស្រាយបញ្ហាប្រឈមនានា ពិសេសបញ្ហាដែលលើកឡើងដោយក្រុមប្រឹក្សាឃុំ-សង្កាត់។
ខ្លឹមសារ៖ ខុទ្ទកាល័យឯកឧត្តមអនុប្រធានទី២ព្រឹទ្ធសភា
រូបភាព៖ នាយកដ្ឋានព័ត៌មាន
