នារសៀលថ្ងៃទី៤ ខែឧសភា ឆ្នាំ២០២៦ នៅសាលភក្តីវិក្រម៣ នៃព្រឹទ្ធសភា ឯកឧត្តមបណ្ឌិត ធន់ វឌ្ឍនា អនុប្រធានទី២ ព្រឹទ្ធសភា បានអញ្ជើញជាអធិបតីដ៏ខ្ពង់ខ្ពស់ក្នុងកិច្ចប្រជុំជាមួយក្រុមនានាព្រឹទ្ធសភា ដើម្បីពិនិត្យសំណើរបស់ក្រុមសមាជិកព្រឹទ្ធសភាប្រចាំភូមិភាគទាំង៨។
យោងតាមស្មារតីអង្គប្រជុំកន្លងមក និងឆន្ទៈនយោបាយរបស់ថ្នាក់ដឹកនាំ ឯកឧត្តមបណ្ឌិត បានដាក់ចេញនូវចំណុចយុទ្ធសាស្រ្ត ៣ ដូចជា៖
១. ពង្រឹងអភិបាលកិច្ច ត្រូវយកចិត្តទុកដាក់ខ្ពស់លើលក្ខណៈសម្បត្តិ និងសមត្ថភាពរបស់សមាជិកក្រុមប្រឹក្សា ជាពិសេស មេឃុំ ចៅសង្កាត់ ដែលជាអ្នកបម្រើប្រជាពលរដ្ឋផ្ទាល់។
២. អំពាវនាវឱ្យគ្រប់គណបក្សនយោបាយ បង្កើនសមាសភាពស្ត្រីក្នុងបញ្ជីបេក្ខជនឈរឈ្មោះបោះឆ្នោតក្រុមប្រឹក្សាឃុំ-សង្កាត់ ក្នុងលំដាប់លេខរៀងដែលអាចជាប់ឆ្នោត ខណៈបច្ចុប្បន្នមានចំនួន ១២៥ ឃុំ/សង្កាត់ ដែលមិនមានស្រ្តីជា សមាជិកក្រុមប្រឹក្សា។
៣. ស្នើឱ្យសមាជិកព្រឹទ្ធសភា ចូលរួមត្រួតពិនិត្យ និងដោះស្រាយបញ្ហាដីធ្លីដែលនៅមានភាពខ្វះចន្លោះនៅតាមភូមិភាគមួយចំនួនជូនប្រជាពលរដ្ឋ។
ជាទីបញ្ចប់ ឯកឧត្តមបណ្ឌិត បានវាយតម្លៃខ្ពស់ចំពោះអង្គប្រជុំទាំងមូល ដែលបានខិតខំស្វែងយល់បញ្ហាប្រឈម និងខិតខំរកដំណោះស្រាយជូនប្រជាពលរដ្ឋ នៅជាពិសេស សំណើទាំងឡាយណាដែលស្នើឡើងដោយក្រុមប្រឹក្សាឃុំ សង្កាត់៕
ខ្លឹមសារ៖ ខុទ្ទកាល័យអនុប្រធានទី២ព្រឹទ្ធសភា
រូបភាព៖ នាយកដ្ឋានព័ត៌មាន
