នារសៀលថ្ងៃសៅរ៍ ៨រោច ខែមិគសិរ ឆ្នាំម្សាញ់ សប្តស័ក ពុទ្ធសករាជ២៥៦៩ ត្រូវនឹងថ្ងៃទី១៣ ខែធ្នូ ឆ្នាំ២០២៥ ក្រុមសមាជិកព្រឹទ្ធសភាប្រចាំភូមិភាគទី៧ (ខេត្តកំពង់ស្ពឺ កំពង់ឆ្នាំង ពោធិ៍សាត់ កោះកុង និងព្រះសីហនុ) ដឹកនាំដោយឯកឧត្តមបណ្ឌិត ម៉ុង ប្ញទ្ធី ប្រធានក្រុម បានអញ្ជើញចូលរួមពិធីបុណ្យគម្រប់៧ថ្ងៃ សពលោកឧត្តមសេនីយ៍ត្រី យួន ស៊ីង នាយទាហាន នៃអង្គភាពកងអន្តរាគមន៍២១០ ចំណុះបញ្ជាការដ្ឋានអង្គរក្ស ដែលបានពលីជីវិតក្នុងសមរភូមិប្រយុទ្ធជាមួយការឈ្លានពានរបស់ថៃ ឈរជើងនៅតំបន់អានសេះ ខេត្តព្រះវិហារ ដើម្បីការពារអធិបតេយ្យភាពជាតិ និងបូរណភាពទឹកដីកម្ពុជា កាលពីវេលាម៉ោង ៥:០០ នាទីយប់ នាថ្ងៃចន្ទ ទី៨ ខែធ្នូ ឆ្នាំ២០២៥ ក្នុងជន្មាយុ៤១ឆ្នាំ។
ក្នុងវេលាដ៏សែនក្រៀមក្រំនេះ ក្រុមសមាជិកក្រុមភូមិភាគទី៧ សូមចូលរួមរំលែកទុក្ខប្រកបដោយមនោសញ្ចេតនាដ៏សែនក្រៀមក្រំជាទីបំផុត ជាមួយក្រុមគ្រួសារចំពោះមរណភាពឧត្តមសេនីយ៍ត្រី យួន ស៊ីង នាយទាហាន ដែលបានពលីជីវិតក្នុងបុព្វហេតុប្រយុទ្ធលើសមរភូមិជាមួយនឹងការឈ្លានពានរបស់ថៃ ដើម្បីការពារបូរណភាពទឹកដីកម្ពុជា ព្រមទាំងបានឧទ្ទិសបួងសួងដល់វត្ថុស័ក្តិសិទ្ធិក្នុងលោកតាមបីបាច់ថែរក្សាដួងវិញ្ញាណក្ខន្ធឧត្តមសេនីយ៍ត្រី យួន ស៊ីង បានបដិសន្ធិក្នុងសុគតិភព កុំបីឃ្លៀងឃ្លាតឡើយ។
ក្នុងឱកាសនោះ ឯកឧត្តម លោកជំទាវក្រុមសមាជិកព្រឹទ្ធសភាប្រចាំភូមិភាគទី៧ បានចូលបុណ្យជាថវិកាផ្ទាល់ខ្លួន និងថវិកាក្រុមភូមិភាគទី៧ ជាមួយគ្រួសារសពចំនួន៣លានរៀល អង្ករ២បាវ (ស្មើនឹង១០០គីឡូក្រាម) និងប្រហុក ផ្អក ចំនួន ៨គីឡូក្រាម។
សូមជម្រាបថា សពរបស់លោកឧត្តមសេនីយ៍ត្រី យួន ស៊ីង ត្រូវបានបូជាកាលពីថ្ងៃទី៩ ខែធ្នូ ឆ្នាំ២០២៥ នៅវត្តខ្ពបអណ្តែត (ហៅវត្តក្របៅ) ស្ថិតក្នុងភូមិក្របៅ សង្កាត់កំពង់សំណាញ់ ក្រុងតាខ្មៅ ខេត្តកណ្តាល។
ពិធីបុណ្យគម្រប់៧ថ្ងៃ ត្រូវបានប្រារព្ធនៅផ្ទះគេហដ្ឋាននៃគ្រួសារសព ស្ថិតក្នុងភូមិក្បាលថ្នល់ ឃុំកក់ ស្រុកបសេដ្ឋ ខេត្តកំពង់ស្ពឺ៕
ប្រភព៖ នាយកដ្ឋានព័ត៌មាន
