គណៈប្រតិភូគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី នៃព្រឹទ្ធសភា (គណៈកម្មការទី៨) ដឹកនាំដោយ លោកជំទាវ មាន សំអាន ប្រធានគណៈកម្មការ បានអញ្ជើញជួបពិភាក្សាការងារជាមួយរដ្ឋបាលខេត្តកំពង់ស្ពឺ និងមន្ទីរជំនាញពាក់ព័ន្ធនឹងវិស័យជាសមត្ថកិច្ចរបស់គណៈកម្មការ ដឹកនាំដោយឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្ត នៅសាលប្រជុំសាលាខេត្តកំពង់ស្ពឺ នាព្រឹកថ្ងៃពុធ ២កើត ខែផល្គុន ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី១៨ ខែកុម្ភៈ ឆ្នាំ២០២៦។
ក្នុងឱកាសជំនួបពិភាក្សាការងារនេះ លោកជំទាវ មាន សំអាន បានមានប្រសាសន៍នាំមកនូវការផ្តាំផ្ញើសាកសួរសុខទុក្ខពីសំណាក់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា ព្រមទាំងថ្នាក់ដឹកនាំព្រឹទ្ធសភារួមមាន ឯកឧត្តម អ៊ុច បូររិទ្ធ អនុប្រធានទី១ និងឯកឧត្តមបណ្ឌិត ធន់ វឌ្ឍនា អនុប្រធានទី២ព្រឹទ្ធសភា ជូនចំពោះថ្នាក់ដឹកនាំខេត្ត មន្ត្រីរាជការ កងកម្លាំងប្រដាប់អាវុធគ្រប់ថ្នាក់ និងប្រជាពលរដ្ឋក្នុងខេត្តកំពង់ស្ពឺប្រកបដោយក្តីនឹករលឹកជាទីបំផុត និងបានជម្រាបអំពីសមិទ្ធផលរបស់ព្រឹទ្ធសភា នីតិកាលទី៥ ក្រោមការដឹកនាំប្រកបដោយគតិបណ្ឌិតខ្ពស់របស់សម្តេចអគ្គមហាសេនាបតីតេជោ បានដាក់ចេញនូវការងារជាអាទិភាពចម្បងចំនួនពីរ គឺទី១.ការលើកកម្ពស់ការទូតសភា និងទី ២.ត្រូវធ្វើការយ៉ាងជិតស្និទ្ធជាមួយអង្គបោះឆ្នោត ជាពិសេសជាមួយក្រុមប្រឹក្សាឃុំ សង្កាត់ ដែលជាតំណាងឱ្យប្រជាពលរដ្ឋនៅមូលដ្ឋាន បន្ថែមលើមុខងារស្នូលទាំងបីរបស់ព្រឹទ្ធសភា គឺមុខងារនីតិកម្ម មុខងារតាមដានការអនុវត្តច្បាប់ និងមុខងារតំណាង។ ជាមួយគ្នានេះ ក៏បានបញ្ជាក់អំពីគោលបំណងនៃដំណើរបំពេញបេសកកម្ម គឺជួបពិភាក្សាការងារជាមួយរដ្ឋបាលខេត្ត មន្ទីរជំនាញពាក់ព័ន្ធនឹងវិស័យ វិស័យសុខាភិបាល សង្គមកិច្ច អតីតយុទ្ធជននិងយុវនីតិសម្បទា ការងារនិងបណ្តុះបណ្តាលវិជ្ជាជីវៈ និងកិច្ចការនារីក្នុងខេត្តកំពង់ស្ពឺ ដើម្បីប្រមូលបាននូវរាល់សំណូមពរ និងបញ្ហាប្រឈមនានា ដែលអាជ្ញាធរខេត្ត មន្ទីរជំនាញលើកឡើង គណៈកម្មការទី៨ នៃព្រឹទ្ធសភានឹងធ្វើរបាយការណ៍ជម្រាបជូនសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងគណៈកម្មាធិការអចិន្ត្រៃយ៍ព្រឹទ្ធសភា ជូនជាយោបល់ទៅក្រសួងពាក់ព័ន្ធ។
បន្ទាប់ពីបានស្តាប់នូវសេចក្តីរាយការណ៍របស់អាជ្ញាធរខេត្តរួចមក និងផ្អែកតាមលទ្ធផលនៃកិច្ចពិភាក្សា លោកជំទាវប្រធានគណៈកម្មការ បានវាយតម្លៃខ្ពស់ចំពោះយន្តការគ្រប់គ្រង និងយុទ្ធសាស្ត្រជាក់ស្តែងដែលថ្នាក់ដឹកនាំរដ្ឋបាលខេត្ត មន្ទីរមានសមត្ថកិច្ចពាក់ព័ន្ធជុំវិញខេត្ត បានខិតខំបំពេញភារកិច្ចរបស់ខ្លួនក្នុងការផ្តល់សេវាជូនប្រជាពលរដ្ឋប្រកបដោយស្មារតីទទួលខុសត្រូវខ្ពស់។ លោកជំទាវបានថ្លែងអំណរគុណយ៉ាងជ្រាលជ្រៅចំពោះឯកឧត្តម លោកជំទាវ លោក លោកស្រី ថ្នាក់ដឹកនាំខេត្ត និងមន្ទីរជុំវិញខេត្តទាំងអស់ ដែលបានធ្វើសេចក្តីរាយការណ៍ និងបង្ហាញបញ្ជាក់បន្ថែមក្នុងកិច្ចពិភាក្សាអំពីវឌ្ឍនភាពការងារដែលខេត្តសម្រេចបាន ជម្រាបជូនគណៈប្រតិភូគណៈកម្មការ និងបានសម្តែងការកោតសរសើរ ចំពោះថ្នាក់ដឹកនាំខេត្ត និងមន្ទីរអង្គភាពជំនាញពាក់ព័ន្ធគ្រប់លំដាប់ថ្នាក់ចំពោះសមិទ្ធផលដ៏ធំធេងក្នុងការចូលរួមថែរក្សាសន្តិភាព ពង្រឹងកិច្ចការពារសន្តិសុខសណ្តាប់ធ្នាប់សាធារណៈក្នុងដែនដីខេត្ត ធ្វើឱ្យប្រជាពលរដ្ឋទទួលបាននូវភាពកក់ក្តៅរួមចំណែករក្សាបានស្ថេរភាពនយោបាយដ៏ល្អប្រសើរ…។
ប្រភព៖ នាយកដ្ឋានព័ត៌មាន
