នារសៀលថ្ងៃព្រហស្បតិ៍ ទី២១ ខែកក្កដា ឆ្នាំ២០២២ ឯកឧត្តម ឡោក ឆាយ អគ្គលេខាធិការរងព្រឹទ្ធសភា បានអញ្ជើញជាអធិបតីភាពក្នុងពិធីបិទវគ្គបណ្តុះបណ្តាលស្តីពី សវនកម្ម និងអធិការកិច្ច ដែលឧទ្ទេសនាមដោយឯកឧត្តម សួន រស្មី អគ្គាធិការ នៃអគ្គាធិការដ្ឋាន ក្រសួងមុខងារសាធារណៈ សិក្សារយៈពេលពីរថ្ងៃ គឺថ្ងៃទី២០ និងទី២១ ខែកក្កដា ឆ្នាំ២០២២ ដោយមានសិក្ខាកាមចូលរួមជាថ្នាក់ដឹកនាំ និងមន្ត្រីរាជការមកពីអង្គភាពចំណុះអគ្គលេខាធិការដ្ឋានព្រឹទ្ធសភា សរុបចំនួន ៣១នាក់ (ប្រុសចំនួន២០នាក់ ស្រីចំនួន១១នាក់) នៅសាលសិក្ខាសាលាខាងជើង វិមានព្រឹទ្ធសភា។
វគ្គបណ្តុះបណ្តាលស្តីពី សវនកម្ម និងអធិការកិច្ច រៀបចំឡើងក្នុងគោលបំណងជួយពង្រឹងនូវចំណេះដឹង បទពិសោធន៍ និងកសាងសមត្ថភាពមន្រ្តីរាជការ ក្នុងការបំពេញការងារឱ្យកាន់តែមានប្រសិទ្ធភាព និងប្រសិទ្ធផល ប្រកបដោយនិរន្តភាព ដោយផ្តោតសំខាន់ទៅលើ៖ ១-និយមន័យ សវនកម្ម និងអធិការកិច្ច ២-តួនាទី និងភារកិច្ចសវនកម្ម ៣-តួនាទី ភារកិច្ច និងអធិការកិច្ច មានដូចជា៖ តួនាទី ភារកិច្ច អធិការកិច្ច នៃក្រសួង ស្ថាប័ន អង្គភាព តួនាទី ភារកិច្ច អ្នកដឹកនាំកិច្ចការអធិការកិច្ច និងភារកិច្ចរបស់ថ្នាក់ដឹកនាំអង្គភាព៕
ប្រភព៖នាយកដ្ឋានព័ត៌មាន
