នាព្រឹកថ្ងៃទី៥ ខែកក្កដា ឆ្នាំ២០២២ នៅសាលប្រជុំសាលាខេត្តបន្ទាយមានជ័យ ឯកឧត្ដម អន ស៊ុំ លេខាធិការគណៈកម្មការទី៤ ឯកឧត្ដម ឈើយ ចាន់ណា លេខាធិការគណៈកម្មការទី៧ និងជាសមាជិកក្រុមសមាជិកព្រឹទ្ធសភា ប្រចាំភូមិភាគទី៤ បានអញ្ជើញចូលរួមក្នុងពិធីអបអរសាទរខួបលើកទី១៥ ទិវាអតីតយុទ្ធជនកម្ពុជា ថ្ងៃទី២១ ខែមិថុនា ឆ្នាំ២០០៧-ថ្ងៃទី២១ ខែមិថុនា ឆ្នាំ២០២២ ក្រោមអធិបតីភាពដ៏ខ្ពង់ខ្ពស់
ឯកឧត្តមនាយឧត្ដមសេនីយ៍ កែ គឹមយ៉ាន ឧបនាយករដ្ឋមន្រ្តី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាអនុប្រធានសមាគមអតីតយុទ្ធជនកម្ពុជា។ ថ្លែងក្នុងឱកាសនោះ ឯកឧត្តម ឧបនាយករដ្ឋមន្រ្តី បានសម្តែងការកោតសរសើរ និងថ្លែងអំណរគុណដល់ក្រសួងសង្គមកិច្ច អតីតយុទ្ធជន និងយុវនីតិសម្បទា សមាគមអតីតយុទ្ធជនកម្ពុជា អង្គភាពពាក់ព័ន្ធ និងសប្បុរជនទាំងអស់ដែលជួយឧបត្ថម គាំទ្រ ដល់ការងារអតីតយុទ្ធជន គ្រប់ពេលវេលា។ ឯកឧត្តម ឧបនាយករដ្ឋមន្រ្តី ក៏បានណែនាំ និងអំពាវនាវដល់អតីតយុទ្ធជនទាំងអស់ អាជ្ញាធរដែនដីគ្រប់លំដាប់ថ្នាក់ កងកម្លាំងប្រដាប់គ្រប់ប្រភេទ ប្រជាពលរដ្ឋ ត្រូវបន្តចូលរួមថែរក្សាសន្តិភាព និងការអភិវឌ្ឍន៍ បន្តចូលរួមគាំពារ និងជួយដល់អតីតយុទ្ធជន គ្រួសារអតីតយុទ្ធដែលបានពលីមរណៈ ពិការភាព និងមនុស្សវ័យចាស់គ្រប់មធ្យោបាយ បន្តចូលរួមអនុវត្តគោលនយោបាយភូមិឃុំ មានសុវត្ថិភាព និងការប្រយុទ្ធប្រឆាំងគ្រឿងញៀនរបស់រាជរដ្ឋាភិបាល ព្រមទាំងបន្តចូលរួមចាក់វ៉ាក់សាំងដូសជម្រុញ និងអនុវត្តវិធានសុខាភិបាលនានា ដើម្បីប្រយុទ្ធប្រឆាំងជំងឺកូវីដ-១៩។
