នាព្រឹកថ្ងៃទី២៨ ខែកក្កដា ឆ្នាំ២០២៤ ឯកឧត្តម ទេព យុទ្ធី លេខាធិការគណៈកម្មការទី៨ព្រឹទ្ធសភា និងជាសមាជិកក្រុមសមាជិកព្រឹទ្ធសភាប្រចាំភូមិភាគទី៥ អមដំណើរដោយ លោកស្រី គឹម ចន្នី អភិបាលរង នៃគណៈអភិបាលខេត្តកែប បានអញ្ជើញចុះជួបសំណេះសំណាលជាមួយក្រុមប្រឹក្សាឃុំ ប្រធានមណ្ឌលសុខភាព នាយប៉ុស្តិ៍នគរបាលរដ្ឋបាលឃុំ ប្រធានភូមិ នៅសាលាឃុំពងទឹក ស្រុកដំណាក់ចង្អើរ ខេត្តកែប។
នាឱកាសនោះដែរ ឯកឧត្តម បានពាំនាំនូវការផ្ដាំផ្ញើសួរសុខទុក្ខ និងការថ្លែងអំណរគុណពីសំណាក់ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងបានមានមតិដោះស្រាយនូវបញ្ហាប្រឈម សំណូមពរមួយចំនួនរបស់រដ្ឋបាលឃុំ ព្រមទាំងបានធ្វើការណែនាំដល់រដ្ឋបាលឃុំ ឱ្យបន្តយកចិត្តទុកដាក់ការពារសន្តិសុខ សុវត្ថិភាព និងសណ្ដាប់ធ្នាប់សាធារណៈ លើកកម្ពស់ប្រសិទ្ធភាពក្នុងការផ្ដល់សេវារដ្ឋបាល សេវាសាធារណៈ តាមដានស្ថានភាពប្រែប្រួលអាកាសធាតុ ដើម្បីមានវិធានការបង្ការ ទប់ស្កាត់ សង្គ្រោះប្រជាជនពីគ្រោះមហន្តរាយនានា និងបន្តយកចិត្តទុកដាក់ថែទាំព្យាបាលជំងឺគ្រប់ប្រភេទជូនប្រជាជនឱ្យបានទាន់ពេលវេលា ធ្វើការអប់រំផ្សព្វផ្សាយ និងបំផុសការចូលរួមគាំទ្រអបអរសាទរគម្រោងព្រែកជីកហ្វូណនតេជោ និងកិច្ចព្រមព្រៀងអភិវឌ្ឍន៍តំបន់ត្រីកោណកម្ពុជា វៀតណាម ទ្បាវ ។
មុននឹងបញ្ចប់ ឯកឧត្តម បាននាំយកនូវអង្ករចំនួន៤០០គីទ្បូក្រាម និងថវិកាចំនួន ៤០ម៉ឺនរៀល ឧបត្ថម្ភជូនរដ្ឋបាលឃុំសម្រាប់រួមចំណែកជួយដល់ប្រជាជនជួបការលំបាកខ្វះខាតក្នុងមូលដ្ឋានផងដែរ។
ប្រភព : ការិយាល័យអមក្រុមសមាជិកព្រឹទ្ធសភាប្រចាំភូមិភាគទី៥
