នាព្រឹកថ្ងៃទី២៩ ខែកក្កដា ឆ្នាំ២០២៥ ឯកឧត្តមបណ្ឌិត ធន់ វឌ្ឍនា អនុប្រធានទី២ ព្រឹទ្ធសភា បានអញ្ជើញទទួលជួបឯកឧត្តម Shaharuddin Onn អគ្គរដ្ឋទូតម៉ាឡេស៊ីប្រចាំព្រះរាជាណាចក្រកម្ពុជា ដើម្បីពិភាក្សា និងសិក្សាអំពីលទ្ធភាពបង្កើនកិច្ចសហប្រតិបត្តិការការទូតសភា និងវិស័យផ្សេងៗទៀតរួមមានអប់រំ សុខភាព ទេសចរណ៍ កសិកម្ម ឧស្សាហកម្ម និងពាណិជ្ជកម្ម រវាងកម្ពុជា ជាមួយម៉ាឡេស៊ី។

បន្ទាប់ពីការលើកឡើងអំពី ទំនាក់ទំនងដ៏ល្អរវាង សម្តេចអគ្គមហាសេនាបតីតេជោ ហ៊ុន សែន ជាមួយថ្នាក់ដឹកនាំម៉ាឡេស៊ី តាំងពីជំនាន់ ឯកឧត្តមបណ្ឌិត Mahathir Mohamad រហូតដល់បច្ចុប្បន្ន ឯកឧត្តមបណ្ឌិត ធន់ វឌ្ឍនា បានថ្លែងអំណរគុណ ឯកឧត្តម Anwar bin Ibrahim និងប្រទេសម៉ាឡេស៊ី ក្នុងនាមជាប្រធានអាស៊ាន ដែលបានធ្វើជាអ្នកសម្របសម្រួលឱ្យមានបទឈប់បាញ់ ក្នុងជម្លោះព្រំដែនកម្ពុជា-ថៃ ដោយមានការចូលរួមពីប្រទេសជាមិត្តដូចជា សហរដ្ឋអាម៉េរិក និងចិន។

ឯកឧត្តមអគ្គរដ្ឋទូតម៉ាឡេស៊ី ឯកភាពជាមួយឯកឧត្តមបណ្ឌិត និងខិតខំធ្វើការឆ្ពោះទៅពង្រីកកិច្ចសហប្រតិបត្តិការទ្វេភាគីកាន់តែខ្លាំងបន្ថែមទៀត ដើម្បីប្រយោជន៍របស់ប្រជាជន និងប្រទេសទាំងពីរ។ ឯកឧត្តមអគ្គរដ្ឋទូត ក៏បានលើកអំពីការអញ្ជើញ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា បំពេញទស្សនកិច្ច នៅព្រឹទ្ធសភាម៉ាឡេស៊ី នាពេលខាងមុខ។ ជាការឆ្លើយតប ឯកឧត្តមបណ្ឌិត បានមានប្រសាសន៍ថា នឹងនាំយកព័ត៌មានអំពីការអញ្ជើញនេះជូន សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា។

ខ្លឹមសារ៖ ខុទ្ទកាល័យអនុប្រធានទី២ព្រឹទ្ធសភា
រូបភាព៖ នាយកដ្ឋានព័ត៌មាន