នាថ្ងៃសៅរ៍ ១១រោច ខែផល្គុន ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី១៤ ខែមីនា ឆ្នាំ២០២៦ ឯកឧត្តម សាយ បូរិន សមាជិកក្រុមសមាជិកព្រឹទ្ធសភាប្រចាំភូមិភាគទី៧ និងជាសមាជិកគណ:កម្មការទី៥ព្រឹទ្ធសភា និងឯកឧត្តម អ៊ឹង លាងហ៊ួ សមាជិកក្រុមសមាជិកព្រឹទ្ធសភាប្រចាំភូមិភាគទី៧ បានអញ្ជើញចុះសួរសុខទុក្ខ ជួបសំណេះសំណាល និងនាំនូវប្រសាសន៍សាកសួរសុខទុក្ខពីសំណាក់ថ្នាក់ដឹកនាំព្រឹទ្ធសភា ជូនក្រុមប្រឹក្សាឃុំកំពង់អុស ស្មៀនឃុំ ប៉ុស្តិ៍រដ្ឋបាលឃុំ និងភូមិ។
នាឱកាសនោះ ឯកឧត្តមបានណែនាំឱ្យរដ្ឋបាលឃុំត្រូវធ្វើការផ្សព្វផ្សាយពីកញ្ចប់ថវិកា និងផែនការអនុវត្តន៍គម្រោងឱ្យពលរដ្ឋបានយល់ដឹងពីគម្រោង និងជួយបន្សាបរាល់ព័ត៌មានមិនពិតកុំឱ្យពលរដ្ឋជឿតាមការបំភ្លៃរបស់ជនអគតិមួយចំនួន ព្រមទាំងបានកោតសរសើរចំពោះការរៀបចំបរិស្ថានក្នុងសាលាឃុំ និងទីធ្លាជុំវិញ មានសោភណភាព និងអនាម័យល្អសមជាកន្លែងបម្រើសេវារដ្ឋបាល។ មួយវិញទៀតចំពោះកិច្ចខិតខំបំពេញភារកិច្ច មានភាពលេចចេញស្នាដៃជាច្រើន ក្នុងការដោះស្រាយសំណូមពរ និងតម្រូវការបន្ទាន់ជូនប្រជាពលរដ្ឋ។ ចំពោះបញ្ហាប្រឈម និងសំណមពររបស់រដ្ឋបាលឃុំ ដែលបានលើកឡើង ឯកឧត្តមនឹងរាយការណ៍ជូនគណៈកម្មការអចិន្ត្រៃយ៍ព្រឹទ្ធសភា។
ក្នុងឱកាសនោះដែរ ឯកឧត្តម អ៊ឹង លាងហ៊ួ បានជូនក្រមាមួយចំនួន និងឯកឧត្តម សាយ បូរិន បានឧបត្ថម្ភថវិកាមួយចំនួនជូនក្រុមប្រឹក្សាឃុំ ស្មៀនឃុំ ប៉ុស្តិ៍រដ្ឋបាលឃុំ ភូមិ និងព្រមទាំងបានថតរូបភាពអនុស្សាវរីយ៍ ប្រគល់ ទទួល ស៊ីម៉ង់៥តោន ខ្សាច់២០ម៉ែត្រគីប និងថ្ម២០ម៉ែត្រគីប សរុបថវិកា ១,០០០ដុល្លារ ជាការឧបត្ថមរបស់ឯកឧត្តម សាយ បូរិន សម្រាប់ចាក់សាបក្រោមសាលាឃុំផងដែរ។
ប្រភព៖ ការិយាល័យជំនួយការ គណៈកម្មការទី៥ព្រឹទ្ធសភា
សម្រួលខ្លឹមសារ៖ នាយកដ្ឋានព័ត៌មាន
