នាព្រឹកថ្ងៃព្រហស្បតិ៍ ២រោច ខែផល្គុន ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី៥ ខែមីនា ឆ្នាំ២០២៦ គណៈកម្មការសិទ្ធិមនុស្ស ទទួលពាក្យបណ្តឹង និងអង្កេត នៃព្រឹទ្ធសភា (គណៈកម្មការទី១) ដឹកនាំដោយឯកឧត្តម ងី ច័ន្ទ្រផល ប្រធានគណៈកម្មការទី១ នៃព្រឹទ្ធសភា បានអញ្ជើញទទួលជួបពិភាក្សាការងារជាមួយថ្នាក់ដឹកនាំក្រសួងអធិការកិច្ច ដឹកនាំដោយឯកឧត្តម សុខ សូកេន រដ្ឋមន្រ្តីក្រសួងអធិការកិច្ច ដើម្បីឈ្វេងយល់អំពីវឌ្ឍនភាពការងាររបស់ក្រសួង និងកិច្ចសហការការងារ នៅសាលប្រជុំពិសេស៣ វិមានព្រឹទ្ធសភា។
ក្នុងឱកាសនោះ ឯកឧត្តម ងី ច័ន្ទ្រផល ប្រធានគណៈកម្មការ បាននាំយកនូវបណ្តាំផ្ញើសួរសុខទុក្ខ ប្រកបដោយសេចក្តីនឹករលឹកពីសំណាក់ថ្នាក់ដឹកនាំព្រឹទ្ធសភា ជូនដល់ឯកឧត្តមរដ្ឋមន្រ្តី ថ្នាក់ដឹកនាំក្រសួងអធិការកិច្ច និងសហការីដែលមានវត្តមាននៅពេលនេះ។ ឯកឧត្តមក៏បានជម្រាបជូនអំពីសាវតា រចនាសម្ព័ន្ធ តួនាទី ភារកិច្ច និងសមត្ថកិច្ចរបស់ព្រឹទ្ធសភា ក៏ដូចជាគណៈកម្មការផងដែរ។ ជាមួយនេះ ឯកឧត្តមប្រធានបានរំលេចអំពីការងារស្នូលរបស់គណ:កម្មការ គឺការងារសិទ្ធិមនុស្ស និងការងារទទួលពាក្យបណ្តឹង ដែលជាកិច្ចការមួយពាក់ព័ន្ធនឹងការងាររបស់ក្រសួង ដែលត្រូវមានកិច្ចសហការគ្នា ដើម្បីដោះស្រាយឆ្លើយតបទៅនឹងតម្រូវការរបស់ប្រជាពលរដ្ឋ។ លើសពីនេះ ឯកឧត្តមក៏បានគូសបញ្ជាក់អំពីអាទិភាពការងារចម្បងចំនួន២ របស់ព្រឹទ្ធសភានីតិកាលទី៥ គឺការលើកកម្ពស់ការទូតសភា និងការរួមប្រាស្រ័យឱ្យកាន់តែជិតស្និទ្ធជាមួយអង្គបោះឆ្នោត ពិសេសក្រុមប្រឹក្សាឃុំសង្កាត់ ដែលជាតំណាងប្រជាពលរដ្ឋនៅមូលដ្ឋាន។
ក្នុងនាមថ្នាក់ដឹកនាំក្រសួងអធិការកិច្ច ដែលជាសេនាធិការរបស់រាជរដ្ឋាភិបាល ឯកឧត្តមរដ្ឋមន្ត្រី បានគោរពថ្លែងអំណរគុណចំពោះសម្តេចតេជោ ប្រធានព្រឹទ្ធសភា ក៏ដូចជាឯកឧត្តមប្រធានគណ:កម្មការទី១ព្រឹទ្ធសភា ដែលបានផ្តល់ឱកាស និងកិត្តិយសដល់ថ្នាក់ដឹកនាំក្រសួងបានមកជួបពិភាក្សាការងារនិងបង្ហាញពីវឌ្ឍនភាព និងសមិទ្ធផលសំខាន់ៗរបស់ក្រសួងអធិការកិច្ចក្នុងនីតិកាលទី៧ នៃរដ្ឋសភា គិតត្រឹមឆ្នាំ២០២៥ ព្រមទាំងទិសដៅការងារ និងគំនិតផ្តួចផ្តើមជាយុទ្ធសាស្ត្រ។ ក្នុងជំនួបពិភាក្សានោះ ឯកឧត្តមរដ្ឋមន្ត្រីបានបង្ហាញពីក្របខណ្ឌគោលនយោបាយ យុទ្ធសាស្ត្រ, លិខិតបទដ្ឋានគតិយុត្ត និងគោលការណ៍ណែនាំ, វឌ្ឍនភាព និងសមិទ្ធផលសំខាន់ៗ, បញ្ហាប្រឈម, និងទិសដៅការងារ និងគំនិតផ្តួចផ្តើមជាយុទ្ធសាស្រ្ត។
ជាចុងបញ្ចប់ ឯកឧត្តមប្រធានគណៈកម្មការ បានវាយតម្លៃខ្ពស់ និងកោតសរសើរចំពោះការដឹកនាំរបស់ឯកឧត្តមរដ្ឋមន្ត្រី ដែលបានខិតខំបំពេញការងារទោះបីមានបញ្ហាប្រឈមមួយចំនួន សម្រេចបានសមិទ្ធផលសំខាន់ៗ និងគំនិតផ្តួចផ្តើមជាយុទ្ធសាស្ត្រដែលអាចធានាបាននូវប្រសិទ្ធភាពក្នុងការដឹកនាំនិងគ្រប់គ្រងវិស័យអធិការកិច្ចនៃព្រះរាជាណាចក្រកម្ពុជា៕
ប្រភព៖ នាយកដ្ឋានព័ត៌មាន
