នារសៀលថ្ងៃទី២៥ ខែមេសា ឆ្នាំ២០២៣ សមាគមអ្នកស្រាវជ្រាវវឌ្ឍនភាពកម្ពុជា-ចិន គាំទ្រដោយអគ្គលេខាធិការដ្ឋានព្រឹទ្ធសភា និងស្ថានទូតចិនប្រចាំកម្ពុជា បានរៀបចំកម្មវិធីបាឋកថាស្តីពី អរិយធម៌សកលបង្កើនល្បឿនឆ្ពោះទៅរកសហគមន៍ជោគវាសនារួមនៃមនុស្សជាតិ។ កម្មវិធីនេះ ប្រព្រឹត្តទៅនៅសាលសិក្ខាសាលាខាងជើងវិមានព្រឹទ្ធសភា ក្រោមអធិបតីភាពឯកឧត្តម ប៊ុន វុទ្ធា អគ្គនាយក នៃអគ្គនាយកដ្ឋានសេវាច្បាប់ និងសមូហភាពដែនដី និងជាតំណាងឯកឧត្តម អ៊ុំ សារឹទ្ធ អគ្គលេខាធិការព្រឹទ្ធសភា ដោយមានការអញ្ជើញចូលរួមពីថ្នាក់ដឹកនាំ មន្រ្តីរាជការនៃអគ្គលេខាធិការដ្ឋានព្រឹទ្ធសភា និងនិស្សិតនៃសកលវិទ្យាល័យមេគង្គកម្ពុជាជាច្រើនរូប។ ពិធីនេះក៏មានមតិស្វាគមន៍ដោយលោកបណ្ឌិត ជា មុនីឫទ្ធិ ប្រធានសមាគមអ្នកស្រាវជ្រាវវឌ្ឍភាពកម្ពុជា-ចិន ព្រមទាំងការធ្វើបទបង្ហាញស្តីពី៖ ១.អរិយធម៌សកលជាលំនឹងសន្តិសុខសកល ដោយឯកឧត្តម កៅ មុយថង ទីប្រឹក្សាផ្ទាល់ និងជាសមាជិកក្រុមលេខាសម្តេចអគ្គមហាពញាចក្រី ហេង សំរិន ប្រធានរដ្ឋសភា និងជាអគ្គលេខាធិការរងនៃក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទទីស្តីការគណៈរដ្ឋមន្រ្តី ២.អរិយធម៌សកលជន្ទល់នៃការអភិវឌ្ឍសកលដោយឯកឧត្តមបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិនៃកម្ពុជា នៃរាជបណ្ឌិត្យសភាកម្ពុជា ៣.អរិយធម៌សកលជាមាគ៌ាថ្មីនៃទំនើបកម្មសង្គម ដោយតំណាងស្ថានទូតចិនប្រចាំកម្ពុជា ៤.អរិយធម៌សកលក្នុងដំណើរឆ្ពោះទៅសម្រេចបាននូវចក្ខុវិស័យរួមរបស់មនុស្សជាតិ ដោយឯកឧត្តម ឈីវ លឹម អគ្គលេខាធិការរងអាជ្ញាធរមីន។ ៥.អរិយធម៌សកលពង្រីកទំហំនៃកិច្ចសហប្រតិបត្តិការពហុភាគីនិយម ដោយលោក សយ សុភាព ប្រធានសមាគមអ្នកសារព័ត៌មានកម្ពុជា-ចិន។
ប្រភព៖ នាយកដ្ឋានព័ត៌មាន
