នៅថ្ងៃទី០៦ ខែមិថុនា ឆ្នាំ២០២១ ឯកឧត្តម ឡៅ ឆន សមាជិកគណៈកម្មការទី៧ព្រឹទ្ធសភា និងជាសមាជិកក្រុមសមាជិកព្រឹទ្ធសភា ប្រចាំក្រុមភូមិភាគទី៤ និងឯកឧត្តមនៅ សំ តំណាងរាស្ត្រមណ្ឌលខេត្តឧត្តរមានជ័យ ឯកឧត្តម យឹម ធិន ទីប្រឹក្សារាជរដ្ឋាភិបាល បានចូលរួមជាអធិបតីជាមួយឯកឧត្តម ប៉ែន កុសល្យ អភិបាលខេត្តឧត្តរមានជ័យ នៅសាលាក្រុងសំរោង ខេត្តឧត្តរមានជ័យ ដើម្បីផ្សព្វផ្សាយកិច្ចការមួយចំនួនជូនដល់អាជ្ញាធរស្រុក ឃុំ និងភូមិ។ ឯកឧត្តមមានប្រសាសន៍ផ្តាំផ្ញើជូនអង្គពិធីដូចខាងក្រោម ៖
១-ណែនាំឱ្យរដ្ឋអាជ្ញាធរគ្រប់ថ្នាក់បន្តការផ្តល់សេវាសាធារណជូនប្រជាពលរដ្ឋឱ្យបានល្អ លឿន រហ័ស និងដល់ដៃពួកគាត់ ពិសេសសុំឱ្យខិតខំធើ្វអត្តសញ្ញាណប័ណ្ណជូនដល់អ្នកដែលទើបគ្រប់អាយុ១៨ឆ្នំា អ្នកដែលបាត់ ខូច និងអ្នកដែលអត្តសញ្ញាណប័ណ្ណហួសសុពលភាព ដើម្បីឱ្យពួកគាត់មានឯកសារគ្រប់គ្រាន់សម្រាប់ទៅបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥ នៅឆ្នាំ២០២២ខាងមុខនេះ។
២-ត្រូវខិតខំការពារសន្តិសុខ សណ្តាប់ធ្នាប់ជូនប្រជាពលរដ្ឋនៅតាមមូលដ្ឋានរបស់ខ្លួន ដើម្បីបង្កើនជំនឿរ និងស្រឡាញ់ពីប្រជាពលរដ្ឋមកលើការដឹកនាំរបស់អាជ្ញាធរយើងដែលជាបំណងប្រាថ្នារបស់ពួកគាត់។
៣-ត្រូវបន្តខិតខំអនុវត្តឱ្យបានជាប្រចាំនូវវិធានការ ៣ការពារ ៣កុំ និង២ចូលរួមរបស់ក្រសួងសុខាភិបាល ដើម្បីបង្ការ និងទប់ស្កាត់ការរីករាលដាលជំងឺកូវីដ-១៩ ដល់ខ្លួនយើង ក្រុមគ្រួសារយើង និងសហគមន៍យើង និងត្រៀមទៅចូលរួមការចាក់វ៉ាក់សាំង ការពារជំងឺកូវីដ-១៩នាពេលខាងមុខ។