ក្រុមសមាជិកាព្រឹទ្ធសភា ដឹកនាំដោយលោកជំទាវ មាន សំអាន ប្រធានក្រុម អនុប្រធានសមាគមនារីកម្ពុជាដើម្បីសន្តិភាព និងអភិវឌ្ឍន៍ បានអញ្ជើញជាអធិបតីក្នុងពិធីសំណេះសំណាល និងចែកចង្ក្រានសន្សំសំចៃថាមពល ធុងចម្រោះទឹកស្អាត កន្សែងពោះគោ និងសារុង ជូនប្រជាពលរដ្ឋចំនួន៣០០គ្រួសារ មកពីឃុំទាំង៨ ក្នុងស្រុកកំចាយមារ ខេត្តព្រៃវែង ដោយមានការអញ្ជើញចូលរួមពីឯកឧត្តមលេខាធិការក្រុមសមាជិកព្រឹទ្ធសភាប្រចាំភូមិភាគទី៦ លោកជំទាវអភិបាលរង នៃគណៈអភិបាលខេត្ត អភិបាលស្រុក ប្រធានមន្ទីរកិច្ចការនារី សមាជិកសាខាសមាគមនារីកម្ពុជាដើម្បីសន្តិភាព និងការអភិវឌ្ឍន៍ខេត្ត និងប្រជាពលរដ្ឋសរុបចំនួន៣០០គ្រួសារ នាព្រឹកថ្ងៃអង្គារ ទី៦ ខែសីហា ឆ្នាំ២០២៤។
ព្រះរាជអំណោយរបស់សម្តេចព្រះមហាក្សត្រី ព្រះវររាជមាតាជាតិខ្មែរ អំណោយរបស់ក្រុមសមាជិកាព្រឹទ្ធសភា សមាគមនារីកម្ពុជាដើម្បីសន្តិភាពនិងអភិវឌ្ឍន៍ និងក្រុមហ៊ុន SIPCO រួមមាន៖ចង្ក្រានសំចៃថាមពលចំនួន១៥០គ្រឿង ធុងចម្រោះទឹកស្អាតចំនួន១៥០គ្រឿង កន្សែងពោះគោចំនួន១៥០ និងសារុងចំនួន១៥០ សម្រាប់ចែកជូនប្រជាពលរដ្ឋចំនួន៣០០គ្រួសារ នៅសាលាស្រុកកំចាយមារ ខេត្តព្រៃវែង។
បន្ទាប់មកនារសៀលថ្ងៃខែឆ្នាំដដែល
ក្រុមសមាជិកាព្រឹទ្ធសភា ដឹកនាំដោយលោកជំទាវ មាន សំអាន បានអញ្ជើញដាក់កម្រងផ្កា អុជធូប គោរពវិញ្ញាណក្ខន្ធ និងរំលឹកគុណដល់ដួងវិញ្ញាណក្ខន្ធសម្តេចអគ្គមហាធម្មពោធិសាល ជា ស៊ីម និងលោកជំទាវ ញ៉ែម សឿន ជា ស៊ីម នៅចេតិយរបស់សម្តេច ស្ថិតនៅភូមិកន្លែងជ្រៅ ឃុំក្របៅ ស្រុកកំចាយមារ ខេត្តព្រៃវែង៕
ប្រភព៖ នាយកដ្ឋានព័ត៌មាន
