នាព្រឹកថ្ងៃទី៤ ខែមីនា ឆ្នាំ២០២៥ ឯកឧត្តម ទេព យុទ្ធី លេខាធិការគណៈកម្មការទី៨ព្រឹទ្ធសភា និងជាសមាជិកក្រុមសមាជិកព្រឹទ្ធសភាប្រចាំភូមិភាគទី៥ បានអញ្ជើញជាអធិបតីក្នុងពិធីសំណេះសំណាលអបអរខួបលើកទី១១៤ ទិវាអន្តរជាតិនារី ៨ មីនា នៅមន្ទីរកិច្ចការនារីខេត្តកែប។ ដោយមានការចូលរួមពីលោកជំទាវសមាជិកាក្រុមប្រឹក្សាខេត្តកែប លោកស្រីប្រធានសាខាមូលនិធិជាតិជំនួយសង្គម ប្រធាន អនុប្រធាន និង មន្ត្រីមន្ទីរកិច្ចការនារីខេត្ត បុគ្គលិកសុខាភិបាលជានារី នៃមន្ទីរពេទ្យបង្អែកខេត្ត និងមន្ត្រីជានារី ឃុំ សង្កាត់ និងភូមិ នៅក្នុងខេត្តកែប សរុបមានចំនួន៨៦នាក់។
ក្នុងឱកាសសំណេះសំណាលនេះ ឯកឧត្តម បានពាំនាំការផ្ដាំសួរសុខទុក្ខ និង ការជូនពររបស់សម្ដេចតេជោ ប្រធានព្រឹទ្ធសភា ឯកឧត្តម អនុប្រធានទី១ និងឯកឧត្តមអនុប្រធានទី២ព្រឹទ្ធសភា ជូនដល់ស្ត្រី និង កុមារទាំងអស់រស់នៅក្នុងខេត្តកែប ព្រមទាំងបានជម្រាបជូនអំពីរចនាសម្ព័ន្ធ តួនាទី ភារកិច្ច មុខងារ របស់ព្រឹទ្ធសភា។ ជាពិសេសបានលើកបង្ហាញអំពីសមិទ្ធិផលដែលរាជរដ្ឋាភិបាល អាណត្តិទី៧ ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលក្នុងនោះផ្តោតជាសំខាន់នូវសមិទ្ធិផលពាក់ព័ន្ធនឹងសមត្ថកិច្ចរបស់គណៈកម្មការទី៨ ព្រឹទ្ធសភា។
មុននឹងបញ្ចប់មតិសំណេះសំណាល ឯកឧត្តមបានសំណូមពរឱ្យមានការរួបរួមសាមគ្គីភាពគ្នា ថែរក្សាសុខសន្តិភាពឱ្យបានរឹងមាំ និង ស្ថិតស្ថេរ, បន្តលើកកម្ពស់គុណភាព ប្រសិទ្ធភាព សេវាសាធារណៈឱ្យបានល្អប្រសើរ, បន្តលើកកម្ពស់ការថែទាំសុខភាព ជូនប្រជាពលរដ្ឋ តាមគ្រប់រូបភាព និងគ្រប់មធ្យោបាយ, ជំរុញការធ្វើបរិវត្តកម្មឌីជីថល ដើម្បីឆ្លើយតបទៅនឹងការវិវត្តន៍នៃបច្ចេកវិទ្យា នៅក្នុងសកលលោក។
ជាចុងបញ្ចប់ ឯកឧត្តម បានជូននូវវត្ថុអនុស្សាវរីយ៍ជាក្រណាត់អាវប៉ាក់ ក្នុងម្នាក់ៗមួយអាវ និងថវិកាចំនួន២០ ០០០រៀល។
ប្រភព : ការិយាល័យអមក្រុមសមាជិកព្រឹទ្ធសភាប្រចាំភូមិភាគទី៥
