នាព្រឹកថ្ងៃពុធ ទី៧ ខែឧសភា ឆ្នាំ២០២៥ ឯកឧត្តមបណ្ឌិត ធន់ វឌ្ឍនា ប្រធានស្ដីទីព្រឹទ្ធសភានៃព្រះរាជាណាចក្រកម្ពុជា បានអញ្ជើញជាអធិបតីពិធីបូជាសពឯកឧត្តម ទេព យុទ្ធី សមាជិកព្រឹទ្ធសភាប្រចាំភូមិភាគទី៥ និងជាលេខាធិការគណៈកម្មការទី៨ព្រឹទ្ធសភា ស្ថិតនៅក្នុងភូមិដំណាក់ចំបក់ សង្កាត់អូរក្រសារ ក្រុងកែប ខេត្តកែប ដោយមានការអញ្ជើញចូលរួមពីសមាជិក សមាជិកាព្រឹទ្ធសភា រដ្ឋសភា រាជរដ្ឋាភិបាល និងអាជ្ញាធររដ្ឋបាលខេត្តកែប ព្រមទាំងបងប្អូនសាច់ញាតិជិតឆ្ងាយនៃសព។
ពិធីបុណ្យសពរបស់ ឯកឧត្តម ទេព យុទ្ធី ត្រូវបានបញ្ចប់ ក្នុងបរិយាកាសពោរពេញដោយភាពក្រៀមក្រំ និងអាឡោះអាល័យជាទីបំផុត, លោកស្រី ទេព ចិន្ដា ត្រូវជាកូនស្រីបង្កើត តំណាងឱ្យក្រុមគ្រួសារសព បានឡើងថ្លែងអំណរគុណដ៏ជ្រាលជ្រៅបំផុតគោរពជូនសមាជិក សមាជិកាព្រឹទ្ធសភា ជាពិសេស សម្ដេចអគ្គមហាសេនាបតីតេជោ ប្រធានព្រឹទ្ធសភា ដែលតែងតែយកចិត្តទុកដាក់ ព្រមទាំងឧបត្ថម្ភដល់ក្រុមគ្រួសាររបស់លោកជំទាវរហូត ចាប់តាំងពីថ្ងៃដំបូងដែលឯកឧត្តម ទេព យុទ្ធី ចាប់ផ្ដើមចូលសម្រាកព្យាបាលនៅមន្ទីរពេទ្យ។
ឯកឧត្តម ទេព យុទ្ធី បានទទួលមរណភាព កាលពីថ្ងៃសៅរ៍ ទី០៣ ខែឧសភា ឆ្នាំ២០២៥ វេលាម៉ោង ១២:១៥ នាទីថ្ងៃត្រង់ ក្នុងជន្មាយុ៦៨ឆ្នាំ ដោយរោគាពាធ។
ខ្លឹមសារ៖ ខុទ្ទកាល័យអនុប្រធានទី២ព្រឹទ្ធសភា
រូបភាព៖ នាយកដ្ឋានព័ត៌មាន
