នាថ្ងៃសៅរ៍ ទី១៧ ខែឧសភា ឆ្នាំ២០២៥ ឯកឧត្តមបណ្ឌិត ធន់ វឌ្ឍនា អនុប្រធានទី២ ព្រឹទ្ធសភា បានដឹកនាំគណៈប្រតិភូព្រឹទ្ធសភា ដែលមានការចូលរួមពីឯកឧត្តម ម៉ម ប៊ុននាង ប្រធានគណៈកម្មការទី១០ ព្រឹទ្ធសភា ឯកឧត្តម លោកជំទាវ តំណាងសាកលវិទ្យាល័យ មន្រ្ដីអគ្គលេខាធិការដ្ឋានព្រឹទ្ធសភា សាស្រ្ដាចារ្យ និងនិស្សិតមកពីសាកលវិទ្យាល័យជាតិប្រមាណជាង ១០សាកលវិទ្យាល័យ ទស្សនាក្រុមហ៊ុន និងរោងចក្រស៊ី.ភី. ខេមបូឌា ចំកាត់ ដើម្បីស្វែងយល់ពីផលិតកម្មដំណាំចំណីសត្វ ការផលិតចំណីសត្វ និងការកែច្នៃអាហារ។ ជាពិសេសការផ្សារភ្ជាប់រវាងវិស័យឯកជន និងគ្រឹះស្ថានឧត្តមសិក្សា និងឆ្ពោះទៅការចុះ MOU រវាងក្រុមហ៊ុនស៊ី.ភី និងគ្រឹះស្ថានឧត្តមសិក្សាមួយចំនួន នាពេលអនាគត។ ដំណើរទស្សនកិច្ចនេះ ក៏នឹងផ្តល់ឱកាសបន្ថែមដល់សមាជិកព្រឹទ្ធសភា មន្រ្តីអគ្គលេខាធិការដ្ឋានព្រឹទ្ធសភា តំណាងគ្រឹះស្ថានឧត្តមសិក្សា និងនិស្សិតបានឃើញ និងស្វែងយល់ពីដំណើរការចាប់តាំងពីការចិញ្ចឹមសត្វរហូតដល់ការកែច្នៃអាហាររបស់ក្រុមហ៊ុនស៊ី.ភី. នេះផងដែរ។ ក្រុមហ៊ុនស៊ី.ភី. ខេមបូឌា ជាក្រុមហ៊ុនខ្នាតធំមួយ ដែលប្រតិបត្តិការអាជីវកម្មកសិ-ឧស្សាហកម្ម និងចំណីអាហារ ដោយក្រុមហ៊ុនផលិតចាប់ពីកសិដ្ឋាន រហូតដល់ចង្រ្កានបាយ ស្ថិតក្រោមចក្ខុវិស័យ «ផ្ទះបាយពិភពលោក» ប្រកបដោយនិរន្តរភាព ដែលផ្តោតសំខាន់លើការប្រតិបត្តិអាជីវកម្មចំណីសត្វ (Feed) ការចិញ្ចឹមសត្វ (Farm) ចំណីអាហារ (Food)។ ដំណើរទស្សនកិច្ចនេះ ប្រព្រឹត្តិទៅនៅក្រុមហ៊ុនស៊ី.ភី ស្ថិតនៅស្រុកភ្នំស្រួច(ពេជ្រនិល) ខេត្តកំពង់ស្ពឺ និងរោងចក្រផលិតចំណីសត្វ ខេត្តកំពត។
ខ្លឹមសារ៖ ខុទ្ទកាល័យឯកឧត្តមអនុប្រធានទី២ ព្រឹទ្ធសភា រូបភាព៖ នាយកដ្ឋានព័ត៌មាន
