នាព្រឹកថ្ងៃចន្ទ ទី២៣ ខែមិថុនា ឆ្នាំ២០២៥ ក្រុមសមាជិកាព្រឹទ្ធសភា ដឹកនាំដោយលោកជំទាវ មាន សំអាន ប្រធានក្រុមសមាជិកាព្រឹទ្ធសភា បានអញ្ជើញជួបពិភាក្សា និងស្តាប់បទបង្ហាញស្តីពី ទិដ្ឋភាព នៃសម្ព័ន្ធភាពជាតិក្រុមប្រឹក្សាថ្នាក់មូលដ្ឋាន និងបញ្ហាប្រឈមរបស់ក្រុមប្រឹក្សាថ្នាក់មូលដ្ឋាន ដឹកនាំដោយឯកឧត្តម សយ កុសល ប្រធានសម្ព័ន្ធភាពជាតិ នៅសាលសិក្ខាសាលាខាងជើង វិមានព្រឹទ្ធសភា ដោយមានការអញ្ជើញចូលរួមពីឯកឧត្តម លោកជំទាវជាសមាជិក សមាជិកាព្រឹទ្ធសភា ព្រមទាំងថ្នាក់ដឹកនាំ មន្ត្រីរាជការនៃអគ្គលេខាធិការដ្ឋានព្រឹទ្ធសភា។ ជំនួបពិភាក្សានេះ រៀបចំឡើងដើម្បី៖ ១-បំពេញមុខងារអាទិភាពចម្បងទីពីរ មុខងារតំណាង ដើម្បីឆ្លើយតបចំពោះតម្រូវការរបស់ប្រជាពលរដ្ឋប្រកបដោយគុណភាព តម្លាភាព គណនេយ្យភាព និងជឿទុកចិត្ត។ ២-ប្រមូលផ្តុំធាតុចូល ដែលជាតម្រូវការ បញ្ហាប្រឈម និងសំណូមពររបស់ក្រុមប្រឹក្សាឃុំ សង្កាត់ ដែលសម្ព័ន្ធភាពបានប្រមូល ចងក្រង ដើម្បីសមាជិកា សមាជិកព្រឹទ្ធសភាបំពេញមុខងារតំណាងចំពោះអង្គបោះឆ្នោតកាន់តែមានប្រសិទ្ធភាព។ ៣-ចូលរួមលើកកម្ពស់សមភាពយេនឌ័រ លើកកម្ពស់ស្ត្រីក្នុងវិស័យនយោបាយ បង្កើនភាពអង់អាចដល់ស្រ្តី និងបរិយាបន្ននៅក្នុងរបៀបវារៈកំណើនសេដ្ឋកិច្ច កិច្ចគាំពារសង្គម និងអភិបាលកិច្ចល្អ។ ៤-បង្កើនភាពស្និទ្ធស្នាល និងផ្លាស់ប្តូរបទពិសោធន៍រវាងសមាជិកា សមាជិកព្រឹទ្ធសភា ជាមួយសម្ព័ន្ធភាពជាតិក្រុមប្រឹក្សាថ្នាក់មូលដ្ឋាន។
ប្រភព៖ នាយកដ្ឋានព័ត៌មាន
