ឯកឧត្តម ឡាយ សំកុល អគ្គលេខាធិការព្រឹទ្ធសភា និងថ្នាក់ដឹកនាំអគ្គលេខាធិការដ្ឋានព្រឹទ្ធសភា បានទទួលជួបតំណាងធនាគារអេស៊ីលីដា ដែលបាននាំយកថវិកាវិភាគទានរបស់ធនាគារអេស៊ីលីដា ចំនួន ២០០ លានរៀល ជូនដល់មូលនិធិព្រឹទ្ធសភាសម្រាប់គាំទ្រកងទ័ពជួរមុខ និងជនភៀសសឹក (ព.ស.ក.ទ និង ជ.ភ.ស)។
ក្នុងនាមអគ្គលេខាធិការដ្ឋានព្រឹទ្ធសភា ឯកឧត្តមអគ្គលេខាធិការបានថ្លែងអំណរគុណយ៉ាងជ្រាលជ្រៅចំពោះបណ្ឌិត អ៊ិន ចាន់នី ប្រធាននាយកប្រតិបត្តិនិងថ្នាក់ដឹកនាំធនាគារអេស៊ីលីដា ចំពោះសមានចិត្តដ៏ល្អប្រពៃ ក្នុងបុព្វហេតុលើកកម្ពស់សាមគ្គីភាពជាតិ និងបានចូលរួមចំណែកយ៉ាងសំខាន់ជាមួយព្រឹទ្ធសភា ក្នុងការជួយគាំទ្រដល់វីរកងទ័ពជួរមុខកម្ពុជាដ៏អង់អាចក្លាហាន និងសម្រាលដល់ទុក្ខលំបាករបស់ជនភៀសសឹកដែលកំពុងត្រូវបានបង្ខំអោយផ្លាស់ទីលំនៅដោយសារសង្គ្រាម និងការវាយប្រហារឈ្លានពានពីកងទ័ពថៃ។
ក្នុងឱកាសនោះផងដែរ តំណាងធនាគារអេស៊ីលីដា ក៏បានបង្ហាញអំពីការជឿជាក់យ៉ាងមុតមាំទៅលើរាជរដ្ឋាភិបាលកម្ពុជា និងការដឹកនាំតស៊ូការពារបូរណភាពដែនដីរបស់ថ្នាក់ដឹកនាំកម្ពុជា ជាពិសេស សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា សម្រាប់សុខសន្តិភាពរបស់ប្រជាពលរដ្ឋកម្ពុជា។
ជំនួបខាងលើនេះ ប្រព្រឹត្តទៅនៅសាលប្រជុំពិសេស៣ វិមានព្រឹទ្ធសភា នារសៀលថ្ងៃអង្គារ ១១រោច ខែមិគសិរ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី១៦ ខែធ្នូ ឆ្នាំ២០២៥។
ខ្លឹមសារ៖ ខុទ្ទកាល័យអគ្គលេខាធិការព្រឹទ្ធសភា
រូបភាព៖ នាយកដ្ឋានព័ត៌មាន
