នារសៀលថ្ងៃចន្ទ ១០រោច ខែពិសាខ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១១ ខែឧសភា ឆ្នាំ២០២៦ វេលាម៉ោង១៤:៣០នាទី លោកជំទាវ មុំ សណ្តាប់ សមាជិកាគណៈកម្មការនីតិកម្ម និងយុត្តិធម៌ នៃព្រឹទ្ធសភា និងជាសមាជិកាក្រុមសមាជិកព្រឹទ្ធសភាប្រចាំភូមិភាគទី១ បានអញ្ជើញជួបសំណេះសំណាលជាមួយចលនានារី(ជាមេគ្រួសារ) នៅក្នុងភូមិ៣ សរុបចំនួន១០គ្រួសារ ស្មើនឹងសមាជិក៥០នាក់ ក្នុងសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។
ក្នុងឱកាសនោះផងដែរ លោកជំទាវបានផ្តល់មតិសំណេះសំណាលជាមួយសមាជិក សមាជិកាចូលរួមដូចជា៖
– ផ្សព្វផ្សាយដល់ប្រជាពលរដ្ឋប្រុងប្រយ័ត្នឱ្យបានខ្ពស់ និងតាមដានព័ត៌មានឱ្យបានប្រុងប្រយ័ត្នអំពីជនឆបោក តាមប្រព័ន្ធបច្ចេកវិទ្យា Online scam។
– ផ្សព្វផ្សាយដល់សមាជិកចូលរួមដែលមានអត្តសញ្ញាណប័ណ្ណជិតហួសសុពលភាព(សល់ត្រឹម១៨០ថ្ងៃ) ឬបាត់ ឬខូច ឬទើបគ្រប់អាយុធ្វើអត្តសញ្ញាណប័ណ្ណ ឱ្យអញ្ជើញមកកាន់ប៉ុស្តិ៍នគរបាល ដើម្បីបន្តសុពលភាព ឬធ្វើថ្មី។
-ផ្សព្វផ្សាយដល់ប្រជាពលរដ្ឋដែលគ្រប់អាយុ ទើបផ្លាស់ទីលំនៅចូលត្រៀមឯកសារសម្រាប់ចុះឈ្មោះបោះឆ្នោត នៅថ្ងៃទី៧ ខែតុលា ឆ្នាំ២០២៦ ខាងមុខនេះ។
ក្រោយពីបានសំណេះសំណាលរួចមក លោកជំទាវ ក៏បានឧបត្ថម្ភថវិកាចំនួន៥០ម៉ឺនរៀល ជូនដល់សមាជិកដែលបានចូលរួមផងដែរ។
បន្ទាប់ពីបញ្ចប់ពិធីសំណេះសំណាលរួចមក លោកជំទាវ បានបន្តអញ្ជើញចុះសួរសុខទុក្ខដល់ចលនានារី ចំនួន៤គ្រួសារ ស្ថិតក្នុងភូមិ៣ ក្នុងនោះ១គ្រួសារទទួលបានអង្ករចំនួន២៥គីឡូក្រាម ជាអំណោយរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត តាមរយៈឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ ព្រមទាំងថវិកា១គ្រួសារ ទទួលបាន៥០.០០០រៀល(ដែលជាថវិកាក្រុមចុះមូលដ្ឋានសង្កាត់ផ្សារដើមថ្កូវ)។
ប្រភព៖ ការិយាល័យជំនួយការគណៈកម្មការទី៦ព្រឹទ្ធសភា
