នាព្រឹកថ្ងៃព្រហស្បតិ៍ ៤កើត ខែបឋមាសាឍ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១៨ ខែមិថុនា ឆ្នាំ២០២៦ ឯកឧត្តមបណ្ឌិត ឈីវ យីស៊ាង ប្រធានគណៈកម្មការទី៥ព្រឹទ្ធសភា និងជានាយកខុទ្ទកាល័យសម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទី នៃព្រះរាជាណាចក្រកម្ពុជាបានទទួលជួបពិភាក្សាការងារជាមួយឯកឧត្តម Henock Puraro សមាជិកព្រឹទ្ធសភា នៃសាធារណរដ្ឋឥណ្ឌូណេស៊ី និងជាអនុប្រធានទី៣ នៃគណៈកម្មការសហប្រតិបត្តិការសភា ព្រមទាំងគណៈប្រតិភូ នៅសាលភក្តីវិក្រម៣ វិមានព្រឹទ្ធសភា។
ឯកឧត្តមបណ្ឌិត ឈីវ យីស៊ាង បានសម្តែងនូវការស្វាគមន៍យ៉ាងកក់ក្តៅចំពោះឯកឧត្តម Henock Puraro និងគណៈប្រតិភូ នាដំណើរទស្សនកិច្ចនៅកម្ពុជានាពេលនេះ។ ដោយគោរពអនុវត្តតាមចក្ខុវិស័យដ៏ខ្ពង់ខ្ពស់របស់សម្តេចតេជោ ភាគីទាំងពីរបានពិភាក្សា ដោយផ្តោតសំខាន់លើការបន្តពង្រឹងកិច្ចសហប្រតិបត្តិការទ្វេភាគី ជាពិសេសរវាងស្ថាប័ននីតិបញ្ញត្តិយើងទាំងពីរ បន្ថែមលើទំនាក់ទំនងជាប្រពៃណីដ៏ល្អ ដែលប្រទេសកម្ពុជា និងឥណ្ឌូនេស៊ី មានតាំងពីយូរលង់ណាស់មកហើយ ដែលរួមមាន៖ នយោបាយ សន្តិសុខ សេដ្ឋកិច្ច ពាណិជ្ជកម្ម ការអប់រំ ការផ្លាស់ប្តូរវប្បធម៌ និងរវាងប្រជាជននិងប្រជាជន។ ទន្ទឹមនឹងនេះ កិច្ចប្រជុំ ក៏បានពិភាក្សាអំពីយន្តការនៃការបង្កើតក្រុមមិត្តភាពព្រឹទ្ធសភាកម្ពុជា-ឥណ្ឌូណេស៊ី និងផែនទីបង្ហាញផ្លូវនៃកិច្ចសហប្រតិបត្តិការនេះ ព្រមជាមួយនឹង កិច្ចសហការជំរុញសម្រេចឱ្យបាននូវគំនិតផ្តួចផ្តើមរបស់សម្តេចតេជោ ក្នុងការរៀបចំ «វេទិកាថ្នាក់ដឹកនាំព្រឹទ្ធសភាអាស៊ាន» ។ ក្រោយជំនួប ឯកឧត្តមបណ្ឌិត ឈីវ យីស៊ាង ក៏បានជូនឯកឧត្តម Henock Puraro និងគណៈប្រតិភូទស្សនាវិមានសាមគ្គីភាពផងដែរ។

ខ្លឹមសារ៖ ខុទ្ទកាល័យសម្តេចតេជោ ប្រធានព្រឹទ្ធសភា
រូបភាព៖ នាយកដ្ឋានព័ត៌មាន