នាព្រឹកថ្ងៃទី១០ ខែសីហា ឆ្នាំ២០២២ លោកជំទាវ មាន សំអាន ប្រធានគណៈកម្មការទី៨ព្រឹទ្ធសភា ឯកឧត្តម ឈួន ឡេង អនុប្រធានគណៈកម្មការទី២ព្រឹទ្ធសភា និងឯកឧត្តម សួន លន់ សមាជិកគណៈកម្មការទី១០ព្រឹទ្ធសភា បានអញ្ជើញចូលរួមក្នុងពិធីបើកសិក្ខាសាលាសភាថ្នាក់តំបន់ ស្តីពីតួនាទីរបស់សភាក្នុងការលើកកម្ពស់ការឆ្លើយតបប្រកបដោយបរិយាប័ន្ន និងចីរភាពចំពោះគ្រោះអាសន្នសុខាភិបាល ករណីសិក្សាអំពីប្រសិទ្ធភាព និងបញ្ហាប្រឈមក្នុងការឆ្លើយតបរបស់ថ្នាក់ជាតិទៅនឹងជំងឺកូរីដ-១៩ ក្រោមអធិបតីភាពលោកជំទាវ ឡោក ខេង ប្រធានគណៈកម្មការទី៨រដ្ឋសភា នៃព្រះរាជាណាចក្រកម្ពុជា ដោយមានការអញ្ជើញចូលរួមពីសមាជិក សមាជិកាព្រឹទ្ធសភា-រដ្ឋសភា ថ្នាក់ដឹកនាំ នៃអគ្គលេខាធិការដ្ឋានរដ្ឋសភា មជ្ឈមណ្ឌលសភាអាស៊ី ព្រមទាំងភ្ញៀវជាតិ-អន្តរជាតិ មកពីបណ្តាប្រទេសមួយចំនួនដូចជា៖ កម្ពុជា ឡាវ មីយ៉ាម៉ា ហ្វីលីពីន វៀមណាម ថៃ ឥណ្ឌូណេសុី នៅសណ្ឋាគារ Royal Angkor Resort and Spa ខេត្តសៀមរាប និងតាមរយៈប្រព័ន្ធនិម្មិត។

អង្គសិក្ខាសាលានេះ ប្រព្រឹត្តទៅរយៈពេល ០២ថ្ងៃគឺចាប់ពីថ្ងៃទី១០ ដល់ ១១ ខែសីហា ឆ្នាំ២០២២ ក្រោមការរៀបចំឡើងដោយគណៈកម្មការទី៨រដ្ឋសភា សហការជាមួយនឹងមជ្ឈមណ្ឌលសភាអាស៊ី ដែលមានការឡើងថ្លែងសន្ទរកថាស្វាគមន៍ដោយឯកឧត្តម ពិន ប្រាកដ អភិបាលរងនៃគណៈអភិបាលខេត្តសៀមរាប ចំណាប់អារម្មណ៍ដោយលោក គឹមយាត ដារ៉ារិទ្ធ នាយកប្រតិបត្តិមជ្ឈមណ្ឌលសភាអាស៊ី និងលោកស្រី វេជ្ជបណ្ឌិត លី អាយឡាន តំណាងអង្គការសុខភាពពិភពលោកប្រចាំព្រះរាជាណាចក្រកម្ពុជា។
ប្រភព៖នាយកដ្ឋានព័ត៌មាន