នារសៀលថ្ងៃព្រហស្បតិ៍ទី ២០ ខែតុលា ឆ្នាំ ២០២២ នៅសណ្ឋារគារ Royal Angkor Resortខេត្តសៀមរាប ក្រោមការដឹកនាំរបស់ លោកជំទាវ អគ្គលេខាធិការនៃអន្តរសភា លោកស្រី H.E. Ms NGUYEN Tuong Van មជ្ឈមណ្ឌលសភាអាស៊ីបានដំណើរការកិច្ចប្រជុំនៃក្រុមប្រឹក្សាពិគ្រោះយោបល់ជាមួយអគ្គលេខាធិការនៃសភានានាដែលជាសមាជិកអាយប៉ា ដើម្បីទទួលបានព័ត៌មានពីតម្រូវការអាទិភាព និងតម្រូវការយុទ្ធសាស្រ្តពង្រឹងសមត្ថភាពរបស់មន្រ្តីសភា សម្រាប់មជ្ឈមណ្ឌលសភាអាស៊ីយកមកពិចារណារៀបចំផែនការសកម្មភាពប្រចាំឆ្នាំ ឲ្យឆ្លើយតបទៅនឹងតម្រូវការរបស់សភា។
ឯកឧត្តមអគ្គលេខាធិការព្រឹទ្ធសភា បានលើកឡើងពីតម្រូវការជាអាទិភាពសម្រាប់សភាកម្ពុជា ដែលរួមមានដូចជា ការពង្រឹងជំនាញស្រាវជ្រាវសភា ការត្រួតពិនិត្យ និងវិភាគថវិកា បច្ចេកទេសតាក់តែងច្បាប់, ការប្រាស្រ័យឆ្លើយឆ្លងជាមួយប្រព័ន្ធផ្សព្វផ្សាយ, ការប្រាស្រ័យឆ្លើយឆ្លងគោលនយោបាយ, ការទូតសភា និងការវិភាគគោលនយោបាយ។