នារសៀលថ្ងៃទី០៣ ខែវិច្ឆិកា ឆ្នាំ២០២២ នៅវិមានព្រឹទ្ធសភា មានរៀបចំសិក្ខាសាលាស្ដីពី “សហគមន៍ជោគវាសនារួមកម្ពុជាចិន ប្រកៀកស្មាគ្នាឆ្ពោះទៅមុខក្នុងដំណើរថ្មី” ក្នុងទម្រង់នៅទីតាំងផ្ទាល់ និងតាមអនឡាញ។ អង្គសិក្ខាសាលាប្រព្រឹត្តទៅក្រោមអធិបតីភាពឯកឧត្តម អ៊ុ សារឹទ្ធ អគ្គលេខាធិការព្រឹទ្ធសភា និងលោក ឈួយ ឈុនឡាយ ប្រធានការិយាល័យមូលនិធិចិន ដើម្បីសន្តិភាព និងការអភិវឌ្ឍប្រចាំកម្ពុជា ក្រោមកិច្ចសហការរៀបចំដោយវិទ្យុមិត្តភាពកម្ពុជាចិន អគ្គលេខាធិការដ្ឋានព្រឹទ្ធសភា និងសមាគមស្រាវជ្រាវវឌ្ឍនភាពកម្ពុជា-ចិន ដោយមានការនិមន្ត និងអញ្ជើញចូលរួមពីព្រះសង្ឃ មន្ត្រីរាជការ និស្សិត និងអ្នកជំនាញជាច្រើន មកពីខុទ្ធកាល័យនាយករដ្ឋមន្ត្រី អគ្គលេខាធិការដ្ឋានព្រឹទ្ធសភា ក្រសួងពាណិជ្ជកម្ម ក្រសួងការបរទេស និងសហប្រតិបត្តិការអន្តរជាតិជាង៨០នាក់។ អង្គសិក្ខាសាលាប្រព្រឹត្តទៅរយៈពេលមួយរសៀល តាមកម្មវិធីដូចខាងក្រោម៖ ១-ចំណាប់អារម្មណ៍របស់លោក AN XIAOYU អគ្គនាយកមជ្ឍមណ្ឌលកម្មវិធីភាសាអាស៊ី និងអាហ្វ្រិក នៃអគ្គស្ថាននីយ៍វិទ្យុ និងទូរទស្សន៍មជ្ឈិមចិន តាមប្រព័ន្ធវីដេអូ។ ២-វីដេអូសារជូនពររបស់ឯកឧត្តម ហោ ណាំហុង ឧបនាយករដ្ឋមន្ត្រី នៃរាជរដ្ឋាភិបាលកម្ពុជា។ ៣-ចំណាប់អារម្មណ៍របស់លោក ឈួយ ឈុនឡាយ ប្រធានការិយាល័យមូលនិធិចិន ដើម្បីសន្តិភាព និងការអភិវឌ្ឍប្រចាំកម្ពុជា។ ៤-បើកអង្គសិក្ខាសាលាដោយឯកឧត្តម អ៊ុ សារឹទ្ធ អគ្គលេខាធិការព្រឹទ្ធសភា។ ៥-ពិធីប្រគល់-ទទួលនិម្មិតរូបនូវសម្ភារអេឡិចត្រូនិចដែលជាជំនួយរបស់មូលនិធិចិន ដើម្បីសន្តិភាព និងការអភិវឌ្ឍ ជូនដល់អគ្គលេខាធិការដ្ឋានព្រឹទ្ធសភា។ ៦-កម្មវិធីបទបង្ហាញពី៖ -លោកស្រី KONG SIQI ប្រធានវិទ្យុមិត្តភាពកម្ពុជា-ចិន។ -លោក អ៊ុ វុទ្ធទី ស្ថាបនិក និងជាប្រធានក្រុមប្រឹក្សាភិបាលសមាគមនិស្សិតកម្ពុជាប្រចាំសាធារណរដ្ឋប្រជាមានិតចិន។ -ឯកឧត្តម ដួង វីរ័ត្ន អ្នកសិក្សាស្រាវជ្រាវជាន់ខ្ពស់ពីប្រទេសចិន។ -លោកស្រី XU XIAOXIA អគ្គនាយិកាវិទ្យុមិត្តភាពកម្ពុជា-ចិន។ -ឯកឧត្តម កៅ មុយថង ទីប្រឹក្សាផ្ទាល់សម្តេចអគ្គពញាចក្រីប្រធានរដ្ឋសភា។ ៧-របាយការបូកសរុបដោយលោកបណ្ឌិត ជា មុនីឬទ្ធិ ប្រធានសមាគមអ្នកស្រាវជ្រាវវឌ្ឍនភាពកម្ពុជា-ចិន។ ៨-ការចាក់បញ្ចាំងវីដេអូរបស់ឯកឧត្តម WANG WETIAN ឯកអគ្គរដ្ឋទូតចិនប្រចាំកម្ពុជា។ ៩-បិទអង្គសិក្ខាសាលារបស់ឯកឧត្តម ឯក សំអុល ប្រធានសមាគមមិត្តភាពកម្ពុជា-ចិន៕
ប្រភព៖នាយកដ្ឋានព័ត៌មាន
