ក្នុងឱកាសនៃបុណ្យកាន់បិណ្ឌ-ភ្ជុំបិណ្ឌ ប្រពៃណីជាតិខ្មែរ នាព្រឹកថ្ងៃទី១៤ ខែកញ្ញា ឆ្នាំ២០២៥ ក្រុមសមាជិកាព្រឹទ្ធសភា ដឹកនាំដោយលោកជំទាវ មាន សំអាន ប្រធានក្រុម បានអញ្ជើញនាំយកនូវទេយ្យទាន ទេយ្យវត្ថុ គ្រឿងឧបភោគ បរិភោគ ចង្ហាន់បិណ្ឌបាត្រ និងបច្ច័យ ចូលរួមក្នុងពិធីបុណ្យកាន់បិណ្ឌវេនទី៧ នៅវត្តកោះកែវបារាយណ៍រតនារាម (វត្តខ្នាតរស្សី) ស្ថិតក្នុងស្រុកពួក ខេត្តសៀមរាប និងវត្តគោកមន ស្ថិតក្នុងឃុំគន្ធារាមគោកមន ស្រុកបន្ទាយអំពិល ខេត្តឧត្តរមានជ័យ។
នាឱកាសដ៏ថ្លៃថ្លានោះ ក្រុមសមាជិកាព្រឹទ្ធសភា បានអញ្ជើញថ្វាយនូវគ្រឿងសក្ការៈបូជា ទៀន ធូប ផ្កាភ្ញី និងប្រារព្ធកិច្ចបទនមស្ការព្រះរតនត្រ័យ សមាទានសីល និមន្តព្រះសង្ឃសូត្រព្រះធម៌ស្វាធ្យាយ ចម្រើនព្រះបរិត្ត និងពុទ្ធជ័យមង្គល ព្រមទាំងនាំយកចង្ហាន់ ទេយ្យទាន គ្រឿងបរិក្ខារ វេរប្រគេនព្រះសង្ឃឧទ្ទិសមហាកុសលជូនដួងវិញ្ញាណក្ខន្ធវីរកងទ័ពដ៏អង់អាចក្លាហាន ដែលបានពលីជីវិតក្នុងបុព្វហេតុជាតិ ការពារបូរណភាពទឹកដី ក្នុងអំឡុងពេលនៃជម្លោះព្រំដែនកម្ពុជា-ថៃ ព្រមទាំងឧទ្ទិសមហាកុសលជូនដល់ញាតិការទាំងប្រាំពីរសន្តាន ឥស្សរជន និងយុទ្ធជន ដែលបានពលីជីវិតដើម្បីជាតិមាតុភូមិ។
ក្រុមសមាជិកាព្រឹទ្ធសភា បានបួងសួងដល់គុណបុណ្យព្រះរតនត្រ័យនិងវត្ថុសក្តិសិទ្ធិ សូមអភិបាលរក្សានិងឃុំគ្រងវីរកងទ័ពកម្ពុជាយើងដែលកំពុងសម្រាកព្យាបាល ឱ្យឆាប់បានធូរស្បើយ និងសូមបួងសួងដល់វត្ថុសក្តិសិទ្ធិដូនតាខ្មែរ ជួយពាំងរាំងមុខកងទ័ពយើងឱ្យមានជោគជ័យនិងសុខសុវត្ថិភាពគ្រប់ពេលវេលា។
ទេយ្យទាន គ្រឿងឧបភោគ បរិភោគ និងបច្ច័យមួយចំនួន សម្រាប់កសាងវត្ត ប្រគេនព្រះសង្ឃ និងនាំយកអំណោយចែកជូនយាយជី តាជី ប្រជាពុទ្ធបរិស័ទចំណុះជើងវត្ត និងប្រជាពលរដ្ឋភៀសសឹក ដែលចូលរួមពិធីបុណ្យកាន់បិណ្ឌនៅវត្តគន្ធារាមគោកមនសរុបចំនួន១៥០គ្រួសារ ដោយក្នុងមួយគ្រួសារៗទទួលបានសារុង១ ក្រមា១ ទឹកឃ្មុំ ត្រីខ នំបុ័ង ទឹកសុទ្ធ និងថវិកាចំនួន២ម៉ឺនរៀល ព្រមទាំងបាននាំយកសំលៀកបំពាក់ ស្ករគ្រាប់ និងថវិកាចែកជូនដល់សិស្សានុសិស្ស និងកុមារា កុមារីភៀសសឹកផងដែរ៕
ប្រភព៖ នាយកដ្ឋានព័ត៌មាន
