ក្នុងពិធីសំណេះសំណាលជាមួយសមាជិក៤១នាក់ នៃក្រុមប្រឹក្សាសង្កាត់ទាំង៥ ក្នុងខណ្ឌជ្រោយចង្វារ រាជធានីភ្នំពេញ នារសៀលថ្ងៃទី៥ ខែមីនា ឆ្នាំ២០២៦ នៅវិមានព្រឹទ្ធសភា ឯកឧត្តមបណ្ឌិត ធន់ វឌ្ឍនា អនុប្រធានទី២ព្រឹទ្ធសភា និងជាប្រធានក្រុមសមាជិកព្រឹទ្ធសភាប្រចាំភូមិភាគទី១ (ភ្នំពេញ) បានសង្កត់ធ្ងន់ថា វិស័យទេសចរណ៍ និងកម្មន្ដសាល (សិប្បកម្ម/ផលិតកម្ម) គឺជាក្បាលម៉ាស៊ីនរុញច្រានសេដ្ឋកិច្ចដ៏សំខាន់នាពេលបច្ចុប្បន្ន និងអនាគត ដែលអាជ្ញាធរមូលដ្ឋានត្រូវយកចិត្តទុកដាក់ខ្ពស់។
ឯកឧត្តមបណ្ឌិត បានលើកទឹកចិត្តដល់អាជ្ញាធរមូលដ្ឋាន បង្កលក្ខណៈងាយស្រួលដល់ការវិនិយោគថ្មីៗ និងអាជីវកម្មដែលមានស្រាប់។ វិស័យកម្មន្ដសាល ពិសេសសហគ្រាសធុនតូចនិងមធ្យមគួរត្រូវបានពង្រឹងបន្ថែម នៅគ្រប់មូលដ្ឋាន។ សិប្បកម្មត្បាញហូល ផាមួង (នៅកោះដាច់) ដែលជាផ្នែកមួយនៃកម្មន្ដសាលបែបប្រពៃណី ត្រូវផ្សារភ្ជាប់ជាមួយទេសចរណ៍ ដើម្បីបង្កើតការងារ និងចំណូលដល់ប្រជាពលរដ្ឋ លើកោះ។
ជាមួយគ្នានោះ ឯកឧត្តមបណ្ឌិត បានផ្ដល់អនុសាសន៍ឱ្យគ្រប់មូលដ្ឋានក្នុងរាជធានីភ្នំពេញ ជាពិសេសខណ្ឌជ្រោយចង្វារ ត្រូវបង្កើនភាពប្រកួតប្រជែង ដើម្បីទាក់ទាញទេសចរ តាមរយៈការរៀបចំសណ្ដាប់ធ្នាប់សាធារណៈ ពង្រឹងសន្តិសុខ និងសោភណតាមដងផ្លូវ, គាំទ្រការលក់ដូរម្ហូបអាហារឆ្ងាញ់ ប្លែក អនាម័យ និងតម្លៃសមរម្យ ដោយរួមបញ្ចូលទាំងការរៀបចំទីកន្លែងសម្រាប់ទស្សនាថ្មីៗ ព្រមទាំងអភិវឌ្ឍតំបន់ដែលមានស្រាប់ ដូចជា វិមានឈ្នះឈ្នះ និងកោះដាច់ ឱ្យកាន់តែទាក់ទាញ។
ជាទីបញ្ចប់ ឯកឧត្តមបណ្ឌិត ធន់ វឌ្ឍនា បានកោតសរសើរថ្នាក់ដឹកនាំសង្កាត់ និងខណ្ឌជ្រោយចង្វារ ដែលខិតខំបំពេញការងារបានយ៉ាងល្អនាពេលកន្លងមក ព្រមទាំងលើកទឹកចិត្តឱ្យអាជ្ញាធរទាំងអស់បន្តរួមគ្នារិះរកដំណោះស្រាយសមស្រប ដើម្បីឆ្លើយតបទៅនឹងបញ្ហាប្រឈម និងសំណូមពររបស់បងប្អូនដែលលើកឡើងនៅតាមមូលដ្ឋាន។
ខ្លឹមសារ៖ ខុទ្ទកាល័យឯកឧត្តមអនុប្រធានទី២ព្រឹទ្ធសភា
រូបភាព៖ នាយកដ្ឋានព័ត៌មាន
