ព្រឹកថ្ងៃទី១០ ខែឧសភា ឆ្នាំ២០២១ ឯកឧត្តម ខៀវ មុត អនុប្រធានគណៈកម្មការទី១ នៃព្រឺទ្ធសភា និង ជាប្រធានក្រុមសមាជិកព្រឹទ្ធសភាប្រចាំភូមិភាគទី៥ , ឯកឧត្តម ទេព យុទ្ធី សមាជិកគណៈកម្មការទី៨ និង ជាលេខាធិការក្រុមសមាជិកព្រឹទ្ធសភាប្រចាំភូមិភាគទី៥ បានអញ្ជើញចុះសំណេះសំណាល សួរសុខទុក្ខ និង លើកទឹកចិត្តរដ្ឋបាលក្រុងកែប ក្រុមប្រឹក្សាសង្កាត់ព្រៃធំ ក្រុមប្រឹក្សាសង្កាត់អូរក្រសារ ក្រុមប្រឹក្សាសង្កាត់កែប ក្នុងក្រុងកែប ខេត្តកែប នៅសាលាក្រុងកែប ។
ក្នុងឱកាសសំណេះសំណាល ឯកឧត្តម ខៀវ មុត បានពាំនាំការផ្ដាំផ្ញើសាកសួរសុខទុក្ខពីសម្ដេចវិបុលសេនាភក្ដីប្រធានព្រឹទ្ធសភា និង ឯកឧត្តមអនុប្រធានព្រឹទ្ធសភា ព្រមទាំងបានសំដែងការកោតសរសើរចំពោះការខិតខំប្រឹងប្រែងបំពេញភារកិច្ចផ្ដល់សេវាលើគ្រប់វិស័យជូនប្រជាពលរដ្ឋ របស់រដ្ឋបាលក្រុង និង ក្រុមប្រឹក្សាសង្កាត់ទាំងបី។ ឯកឧត្តម ក៏បានណែនាំផ្ដាំផ្ញើឲ្យបន្តយកចិត្តទុកដាក់ប្រកបដោយភាពម៉ឺងម៉ាត់ និង ទទួលខុសត្រូវខ្ពស់ក្នុងការអនុវត្តច្បាប់ អនុក្រឹត្យ សេចក្ដីសម្រេច សេចក្ដីណែនាំ និង វិធានការនានា របស់រាជរដ្ឋាភិបាល និង របស់រដ្ឋបាលខេត្តកែប ដើម្បីប្រយុទ្ធ ប្រឆាំង និង ទប់ស្កាត់ការរាលដាលនៃជំងឺកូវីដ-១៩ឲ្យមានប្រសិទ្ធភាព កុំឲ្យឆ្លងចូលក្នុងសហគមន៍ , អប់រំណែនាំប្រជាពលរដ្ឋឲ្យផ្លាស់ប្ដូរឥរិយាបថរស់នៅ និង ប្រកបរបរតាមគន្លងថ្មី អនុវត្តន៍ជាប់ជាប្រចាំនូវវិធានការ ៣ការពារ និង ៣កុំ ព្រមទាំងបាននាំយកនូវអំណោយរួមមាន ៖ ម៉ាស់ អាល់កុល សៀវភៅឯកសារច្បាប់ និង ថវិកាមួយចំនួន ឧបត្ថម្ភដល់រដ្ឋបាលក្រុងកែបនិង ក្រុមប្រឹក្សាសង្កាត់ទាំងបីផងដែរ ។
