khmer eng
  • សម្តេចវិបុលសេនាភក្តី សាយ ឈុំ  ប្រធានព្រឹទ្ធសភាទទួលជួបឯកឧត្តម នាយករដ្ឋមន្រ្តីគុយបា
     
    ចែករំលែក ៖

    នាថ្ងៃទី0៥ ខែតុលា ឆ្នាំ២០២២ វេលាម៉ោង០៩:៣០នាទីព្រឹក នៅវិមានព្រឹទ្ធសភា សម្តេចវិបុលសេនាភក្តី សាយ ឈុំ ប្រធានព្រឹទ្ធសភា នៃព្រះរាជាណាចក្រកម្ពុជា បានទទួលជួបសវនាការជាមួយនឹងឯកឧត្តម ម៉ានូអែល ម៉ារ៉េរ៉ូ គ្រុស (Manuel Marrero Cruz) នាយករដ្ឋមន្រ្តី នៃសាធារណរដ្ឋគុយបា ក្នុងឱកាសដែលឯកឧត្តមដឹកនាំគណៈប្រតិភូមកបំពេញទស្សនកិច្ចជាមិត្តភាព និងផ្លូវការនៃព្រះរាជាណាចក្រកម្ពុជា។
    ក្នុងនាមប្រជាជនកម្ពុជា ព្រឹទ្ធសភាកម្ពុជា និងខ្លួនសម្តេចផ្ទាល់ សម្តេចប្រធានព្រឹទ្ធសភាបានសម្តែងការស្វាគមន៍ដ៏កក់ក្តៅចំពោះឯកឧត្តម ម៉ានូអែល ម៉ារ៉េរ៉ូ គ្រុស និងគណៈប្រតិភូ ដែលបានអញ្ជើញមកបំពេញទស្សនកិច្ចជាមិត្តភាព និងផ្លូវការនៅព្រះរាជាណាចក្រកម្ពុជា។ តាមរយៈដំណើរទស្សនកិច្ចរបស់ឯកឧត្តមនៅ កម្ពុជានាពេលនេះ ពិតជាមានសារៈសំខាន់ជាខ្លាំងដល់ការពង្រឹងពង្រីកចំណងមិត្តភាព និងកិច្ចសហប្រតិបត្តិការល្អរវាងប្រជាជន និងប្រទេសទាំងពីរឱ្យកាន់តែល្អប្រសើរឡើង និងរឹងមាំថែមទៀត ដែលនឹងនាំមកនូវផលប្រយោជន៍ ដ៏ធំធេងទៅវិញទៅមក ទាំងក្នុងពេលបច្ចុប្បន្ន និងក្នុងពេលអនាគត។
    ជាមួយគ្នានេះ សម្តេចប្រធានព្រឹទ្ធសភាបានសម្តែងនូវការចូលរួមសោកស្តាយចំពោះរដ្ឋាភិបាល និងប្រជា- ជនគុយបា ដែលទទួលរងគ្រោះ និងគ្រោះមហន្តរាយខូចខាតដែលបង្កឡើងដោយព្យុះសង្ឃរា Hurricane Ian កាលពីសប្តាហ៍មុន។
    ក្នុងឱកាសនោះ ឯកឧត្តម ម៉ានូអែល ម៉ារ៉េរ៉ូ គ្រុស បានរំលឹកអំពីទំនាក់ទំនង និងកិច្ចសហប្រតិបត្តិដ៏ល្អរវាងប្រទេសទាំងពីរ តាំងពីឆ្នាំ១៩៥៩មក ជាពិសេសទំនាក់ទំនងដ៏ល្អប្រពៃរវាងថ្នាក់ដឹនាំគុយបា និងសម្តេចព្រះបរមរតនកោដ្ឋ។ ក្រៅពីនេះ ប្រទេសទាំងពីរក៏មានទំនាក់ទំនង និងកិច្ចសហប្រតិបត្តិការដ៏ល្អរវាងសភានៃប្រទេសទាំងពីរផងដែរ។ ក្នុងនោះដែរពេលថ្មីៗនេះ សម្តេចអគ្គមហាសេនាបតីតេជា ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានអញ្ជើញបំពេញទស្សនកិច្ចជាផ្លូវការនៅសាធារណរដ្ឋគុយបា និងទស្សនកិច្ចរបស់គណៈប្រតិភូនៅព្រះរាជាណាចក្រកម្ពុជាក្នុងឱកាសនេះ គឺជាសក្ខីភាពនៃការលើកកម្ពស់ទំនាក់ទំនងប្រទេសទាំងពីរឱ្យកាន់តែរឹងមាំថែមទៀត។
    ឯកឧត្តមនាយករដ្ឋមន្រ្តី បានជម្រាបជូនសម្តេចប្រធានព្រឹទ្ធសភាជ្រាបថា គោលបំណងនៃដំណើរទស្សនកិច្ចរបស់គណៈប្រតិភូនាពេលនេះ គឺដើម្បីពង្រឹងពង្រីកនូវទំនាក់ទំនង មិត្តភាព និងកិច្ចសហប្រតិបត្តិការឲ្យកាន់តែរឹងម៉ាំថែមទៀត ជាពិសេសការផ្សារភ្ជាប់ទំនាក់ទំនងខាងសេដ្ឋកិច្ច និងពាណិជកម្ម។
    ឯកឧត្តមនាយករដ្ឋមន្រ្តីបានថ្លែងអំណរគុណដល់ព្រះរាជាណាចក្រកម្ពុជា ដែលបានផ្តល់ជំនួយជាអង្ករ ជូនចំពោះរដ្ឋាភិបាលនិងប្រជាជនគុយបា។ តាមរយៈដណើរទស្សនកិច្ចនេះ ពិតជាមានសារសំខាន់ណាស់ ក្នុងការពង្រឹងពង្រីកទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ ជាពិសេសការផ្សារភ្ជាប់ពាណិជ្ជកម្មនៃប្រទេសទាំងពីរ ដែលអាចរួមចំណែកដល់ការអភិវឌ្ឍប្រទេសគុយបានាពេលខាងមុខ។ ជាមួយគ្នានេះ ឯកឧត្តមសន្យាថា នឹងខិតខំប្រឹងប្រែងឱ្យអស់ពីកម្លាំងកាយចិត្ត ដើម្បីពង្រឹងពង្រីកនូវទំនាក់ទំនង និងកិច្ចសហប្រតិបត្តិការរវាងប្រទេសទាំងពីរឱ្យកាន់តែរឹងមាំថែមទៀត។

    ប្រភព៖ នាយកដ្ឋានព័ត៌មាន


    អត្ថបទពាក់ព័ន្ធ
       អត្ថបទថ្មី
    thumbnail
     
    សម្តេចវិបុលសេនាភក្តី សាយ ឈុំ និងលោកជំទាវ អញ្ជើញគោរពវិញ្ញាណក្ខន្ធសពឯកឧត្តម ឡុង ពៅប្រាជ្ញា
    thumbnail
     
    ប្រតិភូព្រឹទ្ធសភានៃព្រះរាជាណាចក្រកម្ពុជា បានអញ្ជើញចូលរួមស្តាប់របាយការណ៍សរុបកិច្ចប្រជុំកំពូលសភាលើកទី១ ក្នុងសម័យប្រជុំពេញអង្គលេីកទី២ 
    thumbnail
     
    ឯកឧត្តម ម៉ម ឡេងយ៉ានី និងឯកឧត្តម រត្ន័ ហុក អញ្ជើញគោរពវិញ្ញាណក្ខន្ធសពឯកឧត្តម ឡុង ពៅប្រាជ្ញា
    thumbnail
     
    ឯកឧត្តម យ៉ង់ សែម បានអញ្ជេីញចូលរួមជាអធិបតីក្នុងសិក្ខាសាលាពិគ្រោះយោបល់ថ្នាក់ជាតិសម្រាប់ការពិនិត្យជាសកលតាមកាលកំណត់(UPR) ដែលរៀបចំដោយគណ:កម្មាធិការសិទ្ធិមនុស្សកម្ពុជា
    thumbnail
     
    គណៈប្រតិភូព្រឹទ្ធសភាកម្ពុជា បានបន្តចូលរួមក្នុងកិច្ចប្រជុំតាមគណៈកម្មការ នៃកិច្ចប្រជុំកំពូលសភា CLV លើកទី១