បន្ទាប់ពីបានចូលរួមក្នុងពិធីបេីកកិច្ចប្រជុំកំពូលសភាលើកទី១ នាព្រឹកថ្ងៃទី០៥ ខែធ្នូ ឆ្នាំ២០២៣ នៅរសៀលថ្ងៃដដែល ឯកឧត្តម លោកជំទាវ គណៈប្រតិភូព្រឹទ្ធសភាកម្ពុជា បានបន្តចូលរួមក្នុងកិច្ចប្រជុំតាមគណៈកម្មការទាំងបី នៃកិច្ចប្រជុំកំពូលនេះ ក្នុងនោះ ឯកឧត្តម សុខ ឥសាន ប្រធានគណៈកម្មការទី៤ព្រឹទ្ធសភា បានចូលរួមកិច្ចប្រជុំស្តីពីកិច្ចការពារជាតិ និងសន្តិសុខ ក្រោមប្រធានបទ ”ពង្រឹងតួនាទីត្រួតពិនិត្យរបស់សភាឆ្ពោះទៅរកការងារការពារជាតិ និងសន្តិសុខ ដើម្បីធានាបាននូវសន្តិភាព និងស្ថិរភាព ”  ឯកឧត្តម ឈួន ឡេង បានចូលរួមកិច្ចប្រជុំស្តីពីកិច្ចសហប្រតិបត្តិការសេដ្ឋកិច្ច និងសង្គម-វប្បធម៌ ក្រោមប្រធានបទ”ពង្រឹងកិច្ចសហប្រតិបត្តិការសភាក្នុងការលើកកម្ពស់ការតភ្ជាប់នៃសេដ្ឋកិច្ច CLVឆ្ពោះទៅរកគោលដៅនៃការអភិវឌ្ឍន៍ប្រកបដោយចីរភាព និងរួមបញ្ចូល” និងលោកជំទាវ  ឃួន ឃុនឌី បានចូលរួមកិច្ចប្រជុំគណៈកម្មាធិការកិច្ចការបរទេស ក្រោមប្រធានបទ ”ពង្រឹងតួនាទីរបស់សភាក្នុងការជម្រុញកិច្ចសហប្រតិបត្តិការភាពជាដៃគូ សាមគ្គីភាព និងវិបុលភាព”។  និយាយជារួម គណៈកម្មការទាំងបី មានភារកិច្ចពិភាក្សាយ៉ាងផុសផុលលើប្រធានបទរបស់ខ្លួន ស្របតាមគោលបំណងរួមនៃកិច្ចប្រជុំនេះគឺដើម្បីពង្រឹងតួនាទីរបស់សភាក្នុងការជម្រុញកិច្ចសហប្រតិបត្តិការលើគ្រប់វិស័យក្នុងការអភិវឌ្ឍតំបន់ត្រីកោណ កម្ពុជា-ឡាវ-វៀតណាម ប្រកបដោយវិបុលភាព និងបរិយាប័ន្ន។