នារសៀលថ្ងៃទី០៦ ខែធ្នូ ឆ្នាំ២០២៣ ប្រតិភូព្រឹទ្ធសភានៃព្រះរាជាណាចក្រកម្ពុជា រួមមាន ឯកឧត្តម សុខ ឥសាន ប្រធានគណៈកម្មការទី៤ ឯកឧត្តម ឈួន ឡេង អនុប្រធានគណៈកម្មការទី២ និងលោកជំទាវ ឃួន ឃុនឌី សមាជិកាគណៈកម្មការទី៥ ចូលរួមស្តាប់របាយការណ៍សរុបកិច្ចប្រជុំកំពូលសភាលើកទី១ ក្នុងសម័យប្រជុំពេញអង្គលេីកទី២ រាយការណ៍ដោយឯកឧត្តម Chanthavong SENAMADMONTY ប្រធានគណៈកម្មាធិការរៀបចំសេចក្តីព្រាង។ បន្ទាប់ពីសេចក្តីរាយការណ៍ស្តីពីសេចក្តីព្រាង សេចក្តីថ្លែងការណ៍ សម័យប្រជុំពេញអង្គក៏បានអនុម័តសេចក្តីថ្លែងការរួមនៃកិច្ចប្រជុំកំពូលសភាលើកទី១ ក្រោមប្រធានបទ ”ការពង្រឹងតួនាទីរបស់សភាក្នុងការជម្រុញកិច្ចសហប្រតិបត្តិការលើគ្រប់វិស័យរវាងកម្ពុជា-ឡាវ-វៀតណាម” និងបន្តចូលរួមពិធីចុះហត្ថលេខាដោយប្រធានរដ្ឋសភាទាំង៣ លើសេចក្តីថ្លែងការរួម ដែលមានចំនួន៣៩ ចំណុច ។ ជាមួយគ្នានេះក៏មានពិធីប្រគល់ញញួរជូនដល់ឯកឧត្តមប្រធានសភានៃសាធារណរដ្ខសង្គមនិយមវៀតណាម ធ្វេីជាម្ចាស់ផ្ទះរៀបចំកិច្ចប្រជុំកំពូលសភាលើកទី២ ក្នុងឆ្នាំ២០២៥។ ស្របពេលជាមួយគ្នានេះដែរ ឯកឧត្តម លោកជំទាវ ប្រតិភូព្រឹទ្ធសភានៃព្រះរាជាណាចក្រកម្ពុជា ក៏បានបន្តអញ្ជើញចូលរួមពិធីបិទផ្លូវការនៃកិច្ចប្រជុំកំពូលសភាលើកទី១ក្រោមប្រធានបទ ”ការពង្រឹងតួនាទីរបស់សភាក្នុងការជម្រុញកិច្ចសហប្រតិបត្តិការលើគ្រប់វិស័យរវាងកម្ពុជា-ឡាវ-វៀតណាម” នៅទីក្រុងវៀងច័ន្ទន៍ នៃសាធារណរដ្ឋប្រជាធិបតេយ្យប្រជាមានិតឡាវ។