ឯកឧត្តម អ៊ឹង លាងហ៊ួ បាននាំយកឧបករណ៍តេស្តរហ័សរកវិជ្ជមានមេរោគកូវីដ-១៩ ជូនលោក លោកស្រីមេឃុំ តំណាងឲ្យសមាជិកឃុំទាំង១៤ ក្នុងស្រុករលាប្អៀរ ខេត្តកំពង់ឆ្នាំង
រសៀលថ្ងៃអង្គារ ទី១៤ ខែកុម្ភ: ឆ្នាំ២០២៣ ស្ថិតនៅសាលប្រជុំសាលាស្រុករលាប្អៀរ ខេត្តកំពង់ឆ្នាំង ឯកឧត្តម អ៊ឹង លាងហ៊ួ និជាសមាជិកគណៈកម្មការទី៧ ព្រឹទ្ធសភា និងជាសមាជិកក្រុមសមាជិកព្រឹទ្ធសភា ប្រចាំភូមិភាគទី៧ បាននាំយកឧបករណ៍តេស្តរហ័សរកវិជ្ជមានមេរោគកូវីដ-១៩ ចំនួន៧៤ប្រអប់ ដែលជាអំណោយដ៏ថ្លារបស់សម្ដេចវិបុលសេនាភក្ដីប្រធានព្រឹទ្ធសភា ជូនលោក លោកស្រីមេឃុំ តំណាងឲ្យសមាជិកឃុំទាំង១៤ ក្នុងស្រុក ដោយមានការចូលរួមពីសមាជិកក្រុមប្រឹក្សាស្រុក លោកស្រីអភិបាលរងស្រុក សរុប១៦នាក់។ ក្នុងឱកាសនោះ ឯកឧត្តម បានពាំនាំនូវការសាកសួរសុខទុក្ខ និងជូនពរ ថ្នាក់ដឹកនាំព្រឹទ្ធសភា ពិសេសក្រុមសមាជិកព្រឹទ្ធសភា ប្រចាំភូមិភាគទី៧ និងបានថ្លែងកោតសរសើរនូវស្នាដៃជាផ្លែផ្កា នៃការខិតខំធ្វើឲ្យមូលដ្ឋានមានសន្តិសុខ សណ្ដាប់ធ្នាប់សាធារណ:ល្អ ជីវភាពប្រជាជនកាន់តែប្រសើរ និងលើកពីសមិទ្ធផលសង្គមជាតិ ចាប់តាំងពីថ្ងៃ០៧ មករា ១៩៧៩ ពិសេសរយ:ពេល៥ឆ្នាំចុងក្រោយនេះ ក្រោមការដឹកនាំដ៏ត្រឹមត្រូវ និងឈ្លាសវៃរបស់រាជរដ្ឋាភិបាល ដែលមានសម្ដេចអគ្គមហាសេនាបតីតេជោ ហ៊ុន សែន ជាអគ្គមគ្គុទ្ទេសក៍ឆ្នើមប្រកបដោយគតិបណ្ឌិត។ សំណូមពរសុំឲ្យបន្តយកចិត្តទុកដាក់បន្ថែម ៖
-ការអនុវត្តគោលនយោបាយភូមិ ឃុំ មានសុវត្ថិភាព
-ការផ្ដល់សេវាសាធារណ:ជូនប្រជាជនឲ្យបានឆាប់ និងទាន់ពេល
-ជម្រុញការចាក់វ៉ាក់សាំងដូសមូលដ្ឋាន និងដូសជម្រុញ
-ការប្រើប្រាស់កញ្ចប់ថវិកាអភិវឌ្ឍមូលដ្ឋានឲ្យកាន់តែមានប្រសិទ្ធភាព
-ការងារធ្វើអត្តសញ្ញាណបណ្ណជូនប្រជាពលរដ្ឋ
-ខិតខំដោះស្រាយបញ្ហាប្រឈមនានាឲ្យអស់លទ្ធភាព ពិសេសដោះស្រាយជម្លោះក្នុងមូលដ្ឋានក្រៅប្រព័ន្ធតុលាការ។
-និងបន្តប្រើប្រាស់កម្លាំងសរុប មធ្យោបាយសរុប ធនធានសរុប ដោយធ្វើសកម្មភាពឲ្យបានព្រមៗគ្នា ដើម្បីទទួលជ័យជម្នះនាពេលខាងមុខ។ ចុងបញ្ចប់ ឯកឧត្តម បានឧបត្ថម្ភថវិកាមួយចំនួនដល់អ្នកចូលរួមផងដែរ។
អត្ថបទពាក់ព័ន្ធ
