នារសៀលថ្ងៃទី១៦ ខែកុម្ភៈ ឆ្នាំ២០២៣ អគ្គលេខាធិការដ្ឋានព្រឹទ្ធសភា បានរៀបចំពិធីបិទវគ្គបណ្តុះបណ្តាលស្តីពីកម្មវិធីពង្រឹងសមត្ថភាព ដើម្បីអភិវឌ្ឍសមត្ថភាពសារពើពន្ធ ក្រោមអធិបតីភាព ឯកឧត្តម អ៊ុំ សារឹទ្ធ អគ្គលេខាធិការព្រឹទ្ធសភា នៅសាលសិក្ខាសាលាខាងជើងវិមានព្រឹទ្ធសភា។ វគ្គបណ្តុះបណ្តាលនេះមានគោលបំណងពង្រឹងសមត្ថភាពមន្រ្តីសភាក្នុងផ្តល់សេវាគាំទ្របច្ចេកទេសដល់ដំណើរការពិនិត្យផ្តល់យោបល់លើសេចក្តីព្រាងច្បាប់ទាក់ទងនឹងថវិកា ការតាមដាន និងត្រួតពិនិត្យការអនុវត្តច្បាប់ថវិកា ដើម្បីជួយគាំទ្រការលើកកម្ពស់ការអនុវត្តមុខងារបស់សភា ជាពិសេសមុខងារត្រួតពិនិត្យ។ វគ្គបណ្តុះបណ្តាលមានរយៈពេល៨ខែ សិក្សាពីខែឧសភា ឆ្នាំ២០២១ ដល់ខែធ្នូ ឆ្នាំ២០២២ មានសិក្ខាកាមមានចំនួន ១៧រូប បានបញ្ចប់ការសិក្សា ដែលមកពីអគ្គលេខាធិការដ្ឋានព្រឹទ្ធសភា ចំនួន ០៩រូប មកពីអគ្គលេខាធិការដ្ឋានរដ្ឋសភាចំនួន ០៧រូប និងមកពីអគ្គលេខាធិការដ្ឋានរដ្ឋសភាឡាវ ចំនួន ០១រូប។ វគ្គនេះផ្តោតសំខាន់លើ៖ ១ ប្រព័ន្ធថវិកាសាធារណៈ និងមូលដ្ឋានស្ថិតិ ២ គោលការណ៍ហិរញ្ញវត្ថុសាធារណៈ ៣ ការវិភាគសារពើពន្ធ សម្រាប់ការស្រាវជ្រាវថវិកាសភា៕
ប្រភព៖ នាយកដ្ឋានព័ត៌មាន
