នារសៀលថ្ងៃទី២៨ ខែមីនា ឆ្នាំ២០២៣ ឯកឧត្តម ឡោក ឆាយ អគ្គលេខាធិការរងព្រឹទ្ធសភា បានអញ្ជើញជាអធិបតីភាពក្នុងពិធីបិទវគ្គបណ្តុះបណ្តាលស្តីពី អធិការកិច្ច (ជំហានទី២) នៅសាលសិក្ខាសាលាខាងជើង វិមានព្រឹទ្ធសភា។
វគ្គបណ្តុះបណ្តាលនេះឧទ្ទេសនាមដោយ ឯកឧត្តម សួន រស្មី អគ្គាធិការ នៃអគ្គាធិការដ្ឋានក្រសួងមុខងារសាធារណៈ និងជាសាស្ត្រាចារ្យ នៃសាលាភូមិន្ទរដ្ឋបាល ក្នុងគោលបំណងពង្រឹងនូវចំណេះដឹង បទពិសោធន៍ និងកសាងសមត្ថភាពមន្ត្រីរាជការ ក្នុងការបំពេញការងារឲ្យកាន់តែមានប្រសិទ្ធភាព និងប្រសិទ្ធផលប្រកបដោយនិរន្តភាព។ ហើយមានសិក្ខាកាមអញ្ជើញចូលរួមចំនួន២៩នាក់ មកពីអគ្គលេខាធិការដ្ឋានព្រឹទ្ធសភាចំនួន១៧នាក់ និងអគ្គាធិការ នៃអគ្គាធិការដ្ឋានក្រសួងមុខងារសាធារណៈចំនួន១២នាក់។
ការសិក្សាមានរយៈពេលពីរថ្ងៃ គឺចាប់ពីថ្ងៃទី២៧ ដល់ថ្ងៃទី២៨ ខែមីនា ឆ្នាំ២០២៣ ផ្ដោតសំខាន់លើ៖
១.ការងារកម្មវត្ថុអធិការកិច្ច
២.តួនាទី និងភារកិច្ចអធិការកិច្ច
៣.តួនាទី និងភារកិច្ចរបស់ថ្នាក់ដឹកនាំអង្គភាព
៤.ជំហាននៃការអនុវត្តការងារអធិការកិច្ច៕
ប្រភព៖នាយកដ្ឋានព័ត៌មាន
