នាព្រឹកថ្ងៃទី០៥ ខែមេសា ឆ្នាំ២០២៣ នៅសាលសិក្ខាសាលាខាងជើង វិមានព្រឹទ្ធសភា គណៈកម្មការមហាផ្ទៃ ការពារជាតិ ទំនាក់ទំនងរដ្ឋសភា ព្រឹទ្ធសភា អធិការកិច្ច និងមុខងារសាធារណៈនៃព្រឹទ្ធសភា (គណៈកម្មការទី៤) និងគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន នៃព្រឹទ្ធសភា បានប្រជុំអន្តរគណៈកម្មការព្រឹទ្ធសភា ដឹកនាំដោយឯកឧត្តម សុខ ឥសាន ប្រធានគណៈកម្មការទី៤ព្រឹទ្ធសភា ជាមួយនឹងតំណាងរាជរដ្ឋាភិបាល ដឹកនាំដោយឯកឧត្តម វ៉ា គឹមហុង ទេសរដ្ឋមន្ត្រីទទួលបន្ទុកកិច្ចការព្រំដែន និងជាគណៈកម្មាធិការចម្រុះកិច្ចការព្រំដែន ដើម្បីពិនិត្យពិភាក្សាលើសេចក្តីព្រាង ស្តីពីការអនុម័តយល់ព្រមលើសន្ធិសញ្ញាកំណត់ព្រំដែនរវាងព្រះរាជាណាចក្រកម្ពុជា និងសាធារណរដ្ឋប្រជាធិបតេយ្យប្រជាមានិតឡាវ។ សេចក្តីព្រាងច្បាប់នេះ តាក់តែងឡើងមានគោលបំណង កសាងខ្សែព្រំដែនសន្តិភាព ស្ថិរភាព មិត្តភាព សហប្រតិបត្តិការ និងការអភិវឌ្ឍយូរអង្វែង ឈរលើមូលដ្ឋានគោរពឯករាជ្យ អធិបតេយ្យ និងបូរណភាពទឹកដី គោរពផលប្រយោជន៍ ស្មើភាព លើប្រយោជន៍រៀងៗខ្លួន និងដើម្បីបង្កើនឥតឈប់ទំនាក់ទំនងជិតខាងល្អ សាមគ្គីភាពជាប្រពៃណីរវាងព្រះរាជាណាចក្រកម្ពុជា និងសាធារណរដ្ឋប្រជាធិបតេយ្យប្រជាមានិតឡាវ ក្នុងការខិតខំជម្នះធ្វើការបោះបង្គោលព្រំដែន។ សូមរំលឹកដែរថា សេចក្តីព្រាងច្បាប់នេះ នឹងត្រូវដាក់ឆ្លងគណៈកម្មាធិការអចិន្រ្តៃយ៍ព្រឹទ្ធសភា ដើម្បីស្នើសុំដាក់ចូលក្នុងរបៀបវារៈនៃសម័យប្រជុំលើកទី១០ ព្រឹទ្ធសភា នីតិកាលទី៤ នាថ្ងៃទី១០ ខែមេសា ឆ្នាំ២០២៣ខាងមុខធ្វើការអនុម័ត…។
ប្រភព៖នាយកដ្ឋានព័ត៌មាន
