នាព្រឹកថ្ងៃទី២៣ ខែមិថុនា ឆ្នាំ២០២៣ ឯកឧត្តម ឡោកឆាយ អគ្គលេខាធិការរងព្រឹទ្ធសភា បានអញ្ជើញជាអធិបតីភាពក្នុងសិក្ខាសាលាស្តីពីការតម្រង់ទិស និងផ្សព្វផ្សាយអាហារូបករណ៍ទៅបន្តការសិក្សានៅសាធារណរដ្ឋប្រជាមានិតចិន ដែលរៀបចំដោយអគ្គលេខាធិការដ្ឋានព្រឹទ្ធសភា និងសមាគមនិស្សិតកម្ពុជាប្រចាំសាធារណរដ្ឋប្រជាមានិតចិន គាំទ្រដោយក្រសួងអប់រំ យុវជន និងកីឡា នៅវិទ្យាល័យប៉ុនរ៉ានី ហ៊ុនសែន កោះដាច់ ស្ថិតក្នុងភូមិល្វា សង្កាត់កោះដាច់ ខណ្ឌជ្រោយចង្វារ រាជធានីភ្នំពេញ។ សិក្ខាសាលានេះបានដំណើរការតាមកម្មវិធីរួមមាន៖ ១.សេចក្តីរាយការណ៍អំពីប្រវត្តិរបស់វិទ្យាល័យ ប៉ុនរ៉ានី ហ៊ុន សែន កោះដាច់ ដោយលោក ខុន សុខា នាយកវិទ្យាល័យ ២.សេចក្តីរាយការណ៍ដោយលោក អ៊ុ វុទ្ធទី ស្ថាបនិក និងជាប្រធានក្រុមប្រឹក្សាភិបាល ស.ន.ក.ច និងជាជំនួយការសម្តេចវិបុលសេនាភក្តី សាយ ឈុំ ប្រធានព្រឹទ្ធសភា ៣.មតិសំណេះសំណាលក្នុងពិធីសិក្ខាសាលា ដោយឯកឧត្តម ឡោក ឆាយ អគ្គលេខាធិការរងព្រឹទ្ធសភា ៤.បទបង្ហាញស្តីពីការចែករំលែកបទពិសោធន៍ការរៀបចំឯកសារអាហារូបករណ៍និងការប្រលងប្រជែងទទួលអាហារូបការសិក្សា នៅក្រសួងអប់រំ យុវជន និងកីឡា ដោយវាគ្មិនកិត្តិយសលោក ស៉ីរម ភារុណ សមាជិកគណៈកម្មការអាហារូបករណ៍ ស.ន.ក.ច ៥.បទបង្ហាញស្តីពីការចែករំលែកបទពិសោធន៍ អំពីការសិក្សា និងការរស់នៅខេត្តយូនណាន ប្រទេសចិន ដោយវាគ្មិនកិត្តិយសបេក្ខភាពបណ្ឌិតឯកឧត្តម ញិល សូវៀត អនុប្រធានសមាជិកក្រុមប្រឹក្សាភិបាល និងជាជំនួយការសម្តេចវិបុលសេនាភក្តី សាយ ឈុំ ប្រធានព្រឹទ្ធសភា ៦.ការបង្រៀនអំពីមូលដ្ឋានគ្រឹះភាសាចិន ដោយអ្នកគ្រូ LIXUE LIN ទីប្រឹក្សា ស.ន.ក.ច ៧.បទបង្ហាញអំពីនិតីវិធីស្នើសុំអាហារូបករណ៍ទៅបន្តសិក្សានៅប្រទេសចិន ដោយវាគ្មិនកិត្តិយស កញ្ញា ហោ រស្មី អនុប្រធានក្រុមប្រឹក្សាភិបាលសមាគម និងជាប្រធាន ស.ន.ក.ច ៨.សំណូរចម្លើយ និងសំណូមពរផ្សេងៗ ៩.ទស្សនាឃ្លីបវីដេអូស្តីពីជីវិតសិក្សា និងរស់នៅរបស់និស្សិតកម្ពុជានៅប្រទេសចិន ១០.មតិចំណាប់អារម្មណ៍តំណាង សិស្សានុសិស្សវិទ្យាល័យ ប៉ុនរ៉ានី ហ៊ុនសែន កោះដាច់។ ឆ្លៀតក្នុងឱកាសនោះដែរ ឯកឧត្តមក៏បានប្រគល់ជូននូវឧបករណ៍ តេស្តកូវីដ-១៩ និងវត្ថុអនុស្សាវរីយ៍ជូនដល់លោកគ្រូ អ្នកគ្រូ និងប្អូនសិស្សានុសិស្ស៕
ប្រភព៖ នាយកដ្ឋានព័ត៌មាន
