នាព្រឹកថ្ងៃពុធ ទី១៣ ខែសីហា ឆ្នាំ២០២៥ ឯកឧត្តម ឡាយ សំកុល អគ្គលេខាធិការព្រឹទ្ធសភា បានអញ្ជើញជាអធិបតីក្នុងកិច្ចប្រជុំបូកសរុបលទ្ធផលការងាររបស់អគ្គលេខាធិការដ្ឋានព្រឹទ្ធសភាប្រចាំខែកក្កដា និងកំណត់ទិសដៅការងារខែសីហា ឆាំ២០២៥ នៅសាលសិក្ខាសាលាខាងជើង វិមានព្រឹទ្ធសភា ដោយមានការអញ្ជើញចូលរួមពីថ្នាក់ដឹកនាំអង្គភាពចំណុះ ចាប់ពីប្រធាននាយកដ្ឋានឡើង។
មុននឹងចាប់ផ្តើមដំណើរការអង្គប្រជុំ ឯកឧត្តមអគ្គលេខាធិការ បានស្នើដល់អ្នកចូលរួមក្នុងអង្គប្រជុំក្រោកឈរស្មិងស្មាធិ៍ដើម្បីគោរពវិញ្ញាណក្ខន្ធវីរយុទ្ធជនដែលបានពលីជីវិតក្នុងសមរភូមិប្រយុទ្ធជាមួយការឈ្លានពានរបស់កងទ័ពថៃ។
បន្ថែមពីលើទិសដៅការងារដែលបានចាក់បញ្ចាំងក្នុងវីដេអូបូកសរុបលទ្ធផលការងារប្រចាំខែកក្កដា និងទិសដៅការងារខែសីហា ឆ្នាំ២០២៥ ឯកឧត្តមអគ្គលេខាធិការ បានជម្រាបអំពីស្ថានភាពនៅតាមបណ្តោយព្រំដែនកម្ពុជា-ថៃ និងបានណែនាំដល់អង្គភាពពាក់ព័ន្ធត្រៀមផ្តល់សេវាលើមុខងារនីតិកម្ម ដែលព្រឹទ្ធសភានឹងទទួលសេចក្តីព្រាង និងសេចក្តីស្នើច្បាប់ចំនួន២ មកពិនិត្យហើយឱ្យយោបល់។ ចំពោះការងារសហប្រតិបត្តិការអន្តរជាតិ អគ្គលេខាធិការដ្ឋានព្រឹទ្ធសភាត្រៀមរៀបចំជំនួបសវនាការជូនថ្នាក់ដឹកនាំព្រឹទ្ធសភា ជាមួយឥស្សរជនជាន់ខ្ពស់នៃប្រទេសជាមិត្ត និងការអញ្ជើញបំពេញទស្សនកិច្ចទៅកាន់ប្រទេសវៀតណាម។
ចំណែកមុខងារអភិវឌ្ឍន៍ស្ថាប័ន ឯកឧត្តមអគ្គលេខាធិការ បានណែនាំដល់អគ្គនាយកដ្ឋានពាក់ព័ន្ធ ពិនិត្យលើអាហាររូបករណ៍ដែលសាកលវិទ្យាល័យនានាបានផ្តល់ជូនអគ្គលេខាធិការដ្ឋានព្រឹទ្ធសភា សម្រាប់ចែកជូនមន្រ្តីរាជការ ឱ្យត្រូវតាមតម្រូវការ និងជំនាញរបស់អគ្គនាយកដ្ឋាននីមួយៗ ព្រមទាំងពិនិត្យលើការងារបច្ចេកវិទ្យាព័ត៌មាន និងការតាក់តែងខ្លឹមសារក្នុងទស្សនាវដ្តីព្រឹទ្ធសភាឱ្យខ្លី ខ្លឹម និងកុំឱ្យជាន់គ្នាដដែលៗ។
មុននឹងបញ្ចប់ ឯកឧត្តមអគ្គលេខាធិការ បានថ្លែងអំណរគុណចំពោះថ្នាក់ដឹកនាំ មន្រ្តី បុគ្គលិក និងក្រុមយុវជន ស.ស.យ.ក នៃអគ្គលេខាធិការដ្ឋានព្រឹទ្ធសភា ដែលបានចូលរួមគាំទ្រសកម្មភាពទាំងនៅសមរភូមិមុខ និងនៅសមរភូមិក្រោយ ព្រមទាំងសូមបន្តខិតខំយកចិត្តទុកដាក់ខ្ពស់ក្នុងការផ្តល់សេវាឱ្យបានទាន់ពេលវេលា និងគ្រប់ជ្រុងជ្រោយ ដើម្បីជាឧត្តមប្រយោជន៍សម្រាប់ស្ថាប័ន និងប្រទេសជាតិ។
ប្រភព៖ នាយកដ្ឋានព័ត៌មាន
