នារសៀលថ្ងៃទី០៨ ខែកញ្ញា ឆ្នាំ២០២៣ គណៈកម្មការ អប់រំ យុវជន កីឡា ធម្មការ សាសនា វប្បធម៌ វិចិត្រសិល្បៈ និង
ទេសចរណ៍ នៃព្រឹទ្ធសភា (ហៅកាត់គណៈកម្មការទី៧) ដឹកនាំដោយ
ឯកឧត្តមកិត្តិនីតិកោសលបណ្តិត ម៉ុម ជឹមហ៊ុយ ប្រធានគណៈកម្មការ បានអញ្ជើញដាក់កូរោនផ្កាគោរពវិញ្ញាណក្ខន្ធសពឧបាសិកា ខែក គឹមលាង ត្រូវជាម្តាយបង្កើត លោក ម៉ែន ពិសិដ្ឋ អនុប្រធានលេខាធិការដ្ឋានអមគណៈកម្មការទី៧ ព្រឹទ្ធសភា ដែលបានទទួលមរណភាព វេលាម៉ោង៣:៣០នាទីរសៀល ថ្ងៃព្រហស្បតិ៍ ទី៧ ខែកញ្ញា ឆ្នាំ២០២៣ ក្នុងជន្មាយុ ៦៤ឆ្នាំ ដោយរោគាពាធ។
ក្នុងឱកាសប្រកបដោយសេចក្តីខ្សឹកខ្សួលរំជួលចិត្តនេះ ឯកឧត្តមកិត្តិនីតិកោសលបណ្ឌិត បានសម្ដែងនូវការចូលរួមរំលែក
មរណទុក្ខ ដោយសេចក្តីក្រៀមក្រំ ស្រណោះ អាឡោះអាល័យជាទីបំផុត ជាមួយ លោក ម៉ែន ពិសិដ្ឋ
ព្រមទាំងក្រុមគ្រួសារ និងសូមឧទ្ទិសបួងសួងដល់វត្ថុស័ក្តិសិទ្ធិក្នុងលោក និងតេជៈបារមី នៃព្រះពុទ្ធ
ព្រះធម៌ ព្រះសង្ឃ តាមជួយបីបាច់ថែរក្សាដល់ដួងវិញ្ញាណក្ខន្ធសពឧបាសិកា ខែក គឹមលាង
បានទៅកាន់សុគតិភពកុំបីឃ្លៀងឃ្លាតឡើយ។
សូមបញ្ជាក់ថាសពឧបាសិកា ខែក គឹមលាងត្រូវបានតម្កល់ទុកប្រារព្ធពិធីបុណ្យទក្ខិណានុប្បទានតាមប្រពៃណីព្រះពុទ្ធសាសនា នៅផ្ទះលេខ AZ2 ផ្លូវ១៩៨៦ ភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

ប្រភព៖នាយកដ្ឋានព័ត៌មាន