នាព្រឹកថ្ងៃទី២៤ ខែតុលា ឆ្នាំ២០២៣ ក្នុងអំឡុងពេលចូលរួមមហាសន្និបាតសហភាពអន្តរសភាលើកទី១៤៧ (IPU147) នៅប្រទេស Angola គណៈប្រតិភូសភាកម្ពុជា បានអញ្ជើញចូលរួមកិច្ចប្រជុំក្រុមប្រឹក្សាភិបាលលើកទី២១២ ដើម្បីពិនិត្យ និងពិភាក្សាលើរបៀបវារៈសំខាន់ៗមួយចំនួនរួមមាន លទ្ធផលនៃការប្រើប្រាស់ថវិការបស់ IPU ក្នុងឆ្នាំ២០២២  បច្ចុប្បន្នភាពនៃថវិការបស់IPU  ថវិកាសរុបរបស់ IPU សម្រាប់ឆ្នាំ២០២៤  ការបង្កើតការិយាល័យតំបន់របស់ IPU ការបង្កើតក្រុមការងារចំពោះកិច្ចដើម្បីស្វែងរកដំណោះស្រាយដោយសន្តិវិធីចំពោះសង្គ្រាមនៅអ៊ុយក្រែន  ការបោះឆ្នោតជ្រើសតាំងសមាជិកគណៈកម្មាធិការប្រតិបត្តិនៃ IPU  និងការបោះឆ្នោតជ្រើសតាំងប្រធានថ្មីរបស់ IPU សម្រាប់អាណត្តិ ២០២៣-២០២៦។

ទន្ទឹមនេះ  គណៈប្រតិភូសភាកម្ពុជា បានអញ្ជើញចូលរួមកិច្ចប្រជុំគណៈកម្មាធិការអចិន្ត្រៃយ៍ទទួលបន្ទុកលទ្ធិប្រជាធិបតេយ្យ និងសិទ្ធិមនុស្ស នៃសហភាពអន្តរសភា និងវេទិកាសមាជិកសភាវ័យក្មេង។

ដោយឡែក ឯកឧត្តម អ៊ុ សារឹទ្ធ អគ្គលេខាធិការព្រឹទ្ធសភា បានអញ្ជើញចូលរួមកិច្ចប្រជុំសមាគមសមាជិកសភានៃប្រទេសប្រើភាសាបារាំងលើកដំបូងនៅប្រទេស Angola។ កិច្ចប្រជុំនេះគ្រោងនឹងក្លាយជាកិច្ចប្រជុំ sideline របស់ IPU នៅថ្ងៃខាងមុខ។

ប្រភព៖ នាយកដ្ឋានទំនាក់ទំនងអន្តរជាតិ
សម្រួលខ្លឹមសារ៖ នាយកដ្ឋានព័ត៌មាន