នាថ្ងៃទី២៤ ខែមិថុនា ឆ្នាំ២០២៥ ឯកឧត្តមបណ្ឌិត ធន់ វឌ្ឍនា អនុប្រធានទី២ ព្រឹទ្ធសភានៃព្រះរាជាណាចក្រកម្ពុជា បានអញ្ជើញចូលរួមក្នុងកម្មវិធីការដាក់ឱ្យប្រើប្រាស់ បណ្ណាល័យ មេគង្គ-ឡានឆាង នៅក្នុងសាលាបឋមសិក្សាព្រែកលៀប ដោយមានការអញ្ជើញចូលរួមពី ឯកឧត្តម វ៉ាង វិនពីន (Wang Wenbin) ឯកអគ្គរដ្ឋទូតសាធារណរដ្ឋប្រជាមានិតចិនប្រចាំព្រះរាជាណាចក្រកម្ពុជា ឯកឧត្តម លោកជំទាវ សមាជិកព្រឹទ្ធសភាប្រចាំភូមិភាគទី១ លោកគ្រូ អ្នកគ្រូ សិស្សានុសិស្ស និងភ្ញៀវកិត្តិយសជាតិនិងអន្តរជាតិ។ ក្នុងឱកាសនោះដែរ ឯកឧត្តមបណ្ឌិត បានថ្លែងអំណរគុណរដ្ឋាភិបាល និងប្រជាជនចិន ដែលតែងតែរួមចំណែកក្នុងការអភិវឌ្ឍធនធានមនុស្សកម្ពុជា ដូចជាការផ្តល់អាហារូបករណ៍ តាមរយៈសមាគមអាហារូបករណ៍សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត, ក្រសួងអប់រំ យុវជន និងកីឡា ជាដើម។ ឯកឧត្តមបណ្ឌិត បានរំលឹកដែរថា ទំនាក់ទំនងមិត្តដែកថែប កម្ពុជា-ចិន បានឡើងកម្រិតជា «កិច្ចកសាងសហគមន៍ជោគវាសនារួម កម្ពុជា-ចិន គ្រប់រដូវកាល ក្នុងយុគសម័យថ្មី»។ ជាមួយគ្នានោះដែរ ឯកឧត្តមបណ្ឌិត បានបង្ហាញពីទស្សនៈ និងជំនឿយ៉ាងមុតមាំថា ជីវភាព ជាអនុគមន៍នៃសុខភាព និងសមត្ថភាពមានន័យថាជីវភាពរបស់ខ្មែរនឹងប្រែខ្ពស់បាន បើខ្មែរមានសុខភាពល្អ និងសមត្ថភាពខ្ពស់។ ឯកឧត្តមបណ្ឌិត បានអំពាវនាវឱ្យមានការចូលរួមក្នុងគោលនយោបាយលើកកម្ពស់អាហារូបត្ថម្ភ តាមសុភាសិត ហូបតិចៗ ៥មុខ ៥ព័ណ៌ ក្នុង១ថ្ងៃ។ ចំពោះករណីសមត្ថភាព គឺបង្កើនកម្រិតភាសាអង់គ្លេស ក្នុងចំណោមកុមារ ពិសេសកុមារតាមជនបទ។ ភាសាចិនមានប្រយោជន៍ណាស់ ក្នុងវិស័យពាណិជ្ជកម្មជាពិសេសនៅអាស៊ី។
ខ្លឹមសារ៖ ខុទ្ទកាល័យអនុប្រធានទី២ព្រឹទ្ធសភា រូបភាព៖ នាយកដ្ឋានព័ត៌មាន
