នៅថ្ងៃអាទិត្យទី១៦ ខែវិច្ឆិកា ឆ្នាំ២០២៥ គណៈកម្មការអង្កេត បោសសម្អាត និងប្រឆាំងអំពើពុករលួយនៃព្រឹទ្ធសភា ដឹកនាំដោយឯកឧត្តម ម៉ម ប៊ុននាង ប្រធានគណៈកម្មការ រួមជាមួយឯកឧត្តម សុខ សំណាង ជំនួយការសម្តេចអគ្គមហាសេនាបតីតេជោ ហ៊ុន សែនប្រធានព្រឹទ្ធសភា ប្រធានកិត្តិយសមាគមគ្រូពេទ្យព្យាបាលដោយចលនាកម្ពុជា និងជាអ្នកសម្របសម្រួលគម្រោងជំនួយមនុស្សធម៌រវាងព្រឹទ្ធសភាកម្ពុជា ជាមួយមូលនិធិចែករំលែកសង្គ្រោះជីវិតសកល បានអញ្ជើញទទួលជំនួយមនុស្សធម៌លើកទី១៤ ក្នុងទំហំទឹកប្រាក់ប្រមាណជាង ពីរលាន បួនសែនដុល្លារសហរដ្ឋអាមេរិក  ពី ឯកឧត្តម MIN BYOUN JANG តំណាងមូលនិធិចែករំលែកសង្គ្រោះជីវិតសកល Global Life Sharing (GLS) នៃសាធារណរដ្ឋកូរ៉េ និងបណ្ដាមិត្តដៃគូជាអាទិ៍ លោកឧកញ៉ា សុខ សីលា , ភេសជ្ជៈយ៉ិនសិនកូរ៉េអាឈីម៉ាដាំង (Achimmdang Red Ginseng) OKTA ភ្នំពេញ, មជ្ឈមណ្ឌល PGCT, ក្រុមហ៊ុនមេធាវី C.K. ការិយាល័យមេធាវី One Asia Law Firm, ធនាគារ KB Daehan Specialized Bank Plc និងប្រធាន Nextgen Leaders Network។ 
 
ជំនួយមនុស្សធម៌លើកទី១៤ របស់មូលនិធិចែករំលែកសង្គ្រោះជីវិតសកល និងបណ្តាមិត្តដៃគូរួមមាន ៖ ថ្នាំពេទ្យ, សម្ភារៈវេជ្ជសាស្ត្រ ឧបករណ៍វេជ្ជសាស្ត្រ និងសម្ភារប្រើប្រាស់ប្រចាំថ្ងៃ សម្រាប់ចូលរួមចំណែកលើកកម្ពស់សុខុមាលភាពជនភៀសសឹកនៅតាមបណ្តោយព្រំដែនកម្ពុជា-ថៃ និងប្រជាជនងាយរងគ្រោះនៅកម្ពុជា តាមរយៈព្រឹទ្ធសភានៃព្រះរាជាណាចក្រកម្ពុជា។ 
 
សូមរំលឹកថា គណៈកម្មការទី១០ព្រឹទ្ធសភា បានអនុស្សរណៈនៃការយោគយល់គ្នា ជាមួយមូលនិធិចែករំលែកសង្គ្រោះជីវិតសកលនៃសាធារណរដ្ឋកូរ៉េ (GLS) លើដំបូងក្នុងឆ្នាំ ២០២២ ដោយមានចំនួនទឹកប្រាក់ស្មើនឹង ១០លានដុល្លារសហរដ្ឋអាមេរិក។ បន្ទាប់មកក្នុងឆ្នាំ២០២៤ អនុស្សរណៈនេះត្រូវបានពង្រីក និងបន្តថែមឡើងចំនួន៥ឆ្នាំទៀត ដែលមានទឹកប្រាក់សរុបចំនួន៤០លានដុល្លារសហរដ្ឋអាមេរិក ក្នុងកិច្ចបង្កើនការសហការទ្វេភាគី។ 

ប្រភព​៖​ ការិយាល័យ​ជំនួយ​ការ​គណៈកម្មការ​ទី១០ព្រឹទ្ធសភា​