នាព្រឹកថ្ងៃសុក្រ ៨កើត ខែមិគសិរ ឆ្នាំម្សាញ់ សប្ដស័ក ព.ស.២៥៦៩ ត្រូវនឹងថ្ងៃទី២៨ ខែវិច្ឆិកា ឆ្នាំ២០២៥ ឯកឧត្តមបណ្ឌិត ចែម វីឌ្យ៉ា ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ និងព័ត៌មាន នៃព្រឹទ្ធសភា បានអញ្ជើញទទួលគ្រឿងឥស្សរិយយស Grand Cross of Merit with Star of the Order of Merit of the Federal Republic of Germany របស់សាធារណរដ្ឋសហព័ន្ធអាល្លឺម៉ង់ ពី ឯកឧត្តមប្រធានាធិបតីនៃសាធារណរដ្ឋសហព័ន្ធអាល្លើម៉ង់ គឺ បណ្ឌិត Frank Walter Steinmeier នៅនិវេសនដ្ឋានឯកឧត្តម ឯកអគ្គរដ្ឋទតអាល្លឺម៉ង់ប្រចាំព្រះរាជាណាចក្រកម្ពុជា លោក Stefan Messerer។

ក្នុងឱកាសនោះ ក៏មានអញ្ជើញចូលរួមអបអរសាទរដ៏ខ្ពង់ខ្ពស់ពីសំណាក់ឯកឧត្តមបណ្ឌិត ធន់ វឌ្ឍនា អនុប្រធានទី២ព្រឹទ្ធសភា ឯកឧត្តម លោកជំទាវប្រធានគណៈកម្មការមួយចំនួននៃព្រឹទ្ធសភា ឯកឧត្តមអគ្គលេខាធិការព្រឹទ្ធសភា ឯកឧត្តមនាយកខុទ្ទកាល័យសម្តេចតេជោប្រធានព្រឹទ្ធសភា និង អ្នកមុខអ្នកការនៃស្ថាប័ននិតិប្រតិបត្តិរបស់ ព្រះរាជាណាចក្រកម្ពុជា។

សូមជម្រាបជូនថា គ្រឿងឥស្សរិយយសដែលផ្តល់ជូនឯកឧត្តមបណ្ឌិត ចែមវីឌ្យ៉ា គឺជាគ្រឿងឥស្សរិយយសជាន់ខ្ពស់លំដាប់ទី២ ដោយរាប់ពីលើមក នៃសាធារណរដ្ឋសហព័ន្ធអាល្លឺម៉ង់ សម្រាប់បំពាក់ជូនឥស្សរជនបរទេស។

ប្រភព៖ នាយកដ្ឋានព័ត៌មាន