នាព្រឹកថ្ងៃពុធ ទី១៣ ខែឧសភា ឆ្នាំ២០២៦ ឯកឧត្តម អ៊ុច បូររិទ្ធ ប្រធានស្តីទីព្រឹទ្ធសភា តំណាងដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទី និងជាប្រធានព្រឹទ្ធសភា បានអនុញ្ញាតឱ្យ លោក Jacques GUICHANDUT នាយកគ្រប់គ្រងមហោស្រពអូប៉េរ៉ាអន្តរជាតិភ្នំពេញ (PPIOF) ចូលជួបសម្តែងការគួរសម និងពិភាក្សាការងារ នៅវិមានសាមគ្គីភាព នៃព្រឹទ្ធសភា។
នៅក្នុងឱកាសនោះ ឯកឧត្តមប្រធានស្តីទីព្រឹទ្ធសភា បានសម្តែងនូវក្តីអំណរអរគុណចំពោះទឹកចិត្តសប្បុរសធម៌របស់លោក Jacques GUICHANDUT និងសប្បុរសជនទាំងអស់ ដែលបានខិតខំរៀបចំព្រឹត្តិការណ៍សិល្បៈ ដើម្បីប្រមែប្រមូលវិភាគទានស្ម័គ្រចិត្តជួយដល់ប្រជាជនភៀសសឹក ដែលបានឃ្លាតចាកពីភូមិឋាន ផ្ទះសម្បែង ដោយសារអំពើឈ្លានពានលើបូរណភាពទឹកដីកម្ពុជាពីសំណាក់កងទ័ពថៃ។ ឯកឧត្តមបានបន្ថែមថា ទឹកចិត្តរបស់លោក Jacques GUICHANDUT និងសប្បុរសជនទាំងអស់ ស្តែងឱ្យឃើញនូវសាម្គីភាព និងជាការលើកទឹកចិត្តដល់ប្រជាជនកម្ពុជា និងរាជរដ្ឋាភិបាល ក្នុងការតស៊ូការពារបូរណភាពដែនដី ឯករាជ្យភាព អធិប្បតេយភាព ដោយផ្អែកលើច្បាប់ ធម្មនុញ្ញ អ.ស.ប និងធម្មនុញ្ញអាស៊ាន។
លោក Jacques GUICHANDUT បានជម្រាបជូនថា ក្រោយពីការសម្តែងអូប៉េរ៉ារឿង Don Giovanni កាលពីខែធ្នូ ឆ្នាំ២០២៥ ត្រូវបានបញ្ចប់ មហោស្រពអូប៉េរ៉ាអន្តរជាតិភ្នំពេញ ទទួលបានថវិកាចំនួនទឹកប្រាក់ចំនួន ១៥ ០០០ ដុល្លារអាម៉េរិក ពីការសម្តែង សម្រាប់ប្រគល់ជូន សម្តេចតេជោ ប្រធានព្រឹទ្ឋសភា ក្នុងការរួមចំណែកប្រកបដោយទឹកចិត្តជ្រះថ្លា ជួយជនភៀសសឹក ដែលបាននិងកំពុងរងទុក្ខយ៉ាងខ្លាំង ដោយសារជម្លោះព្រំដែនកម្ពុជា-ថៃ។ ទោះបីជាជម្លោះនេះកំពុងឈានដល់ការបញ្ចប់ក៏ដោយ ក៏ការខូចខាតដែលបានបង្កឡើងលើជីវិតមនុស្សជាច្រើន នៅតែមានកម្រិតធ្ងន់ធ្ងរ ហើយមហោស្រព PPIOF សង្ឃឹមយ៉ាងមុតមាំថា ការចូលរួមចំណែកដ៏តិចតួចនេះ នឹងជួយសម្រាលទុក្ខ ព្រមទាំងនាំមកនូវភាពកក់ក្តៅខ្លះ ដល់អ្នកដែលបាននិងកំពុងឆ្លងកាត់ពេលវេលាដ៏លំបាកនេះ។
លោក Jacques GUICHANDUT បានបន្ថែមថា ការរៀបចំ «ការប្រគំតន្ត្រីដើម្បីសន្តិភាព» (Concert for Peace) នៅឆ្នាំ២០២៦ មានគម្រោងរៀបចំឡើងស្របពេលជាមួយសន្និសីទកំពូលហ្វ្រង់កូហ្វូនីលើកទី២០ ដែលកម្ពុជាមានកិត្តិយសធ្វើជាម្ចាស់ផ្ទះ នៅរាជធានីភ្នំពេញ នាខែវិច្ឆិកា ឆ្នាំ២០២៦ ខាងមុខនេះ។ «ការប្រគំតន្ត្រីដើម្បីសន្តិភាព» និងមានការប្រមូលផ្តុំតារាចម្រៀងល្បីៗលំដាប់ពិភពលោកមកពីបណ្តាប្រទេសនិយាយភាសាបារាំង ក៏ដូចជាបុគ្គលលេចធ្លោក្នុងប្រវត្តិសាស្ត្រសន្តិភាព រួមទាំងអតីតម្ចាស់ពានរង្វាន់ណូបែលសន្តិភាព ដើម្បីនាំសារអំពីកម្ពុជាសម័យទំនើប មានស្ថិរភាព និងការផ្សះផ្សាជាតិ ក្រោមគំនិត «Peace Cambodia»។
លោក Jacques GUICHANDUT បានសង្កត់ធ្ងន់ថា តាមរយៈវប្បធម៌ និងការទូត យើងត្រូវបង្ហាញពិភពលោកថា ប្រទេសកម្ពុជា ជានិមិត្តរូបពិតប្រាកដនៃសន្តិភាព និងថាមវន្ត។
ឯកឧត្តមប្រធានស្តីទីព្រឹទ្ធសភា បានថ្លែងអំណរគុណ និងសម្តែងការស្វាគមន៍ដ៏កក់ក្តៅចំពោះគម្រោង«ការប្រគំតន្ត្រីដើម្បីសន្តិភាព» និងត្រៀមសហការរួមចំណែកជួយដល់ការប្រព្រឹត្តទៅនៃព្រឹត្តិការណ៍នេះ ឱ្យបានជោគជ័យ៕
ប្រភព៖ ខុទ្ទកាល័យឯកឧត្តមអនុប្រធានទី១ព្រឹទ្ធសភា
